Прадпрыемства «Гомельтранснафта» пачало рамонт на беларускім участку магістральнага нафтаправоду «Дружба», каб сынхранізаваць яго з аналягічнымі работамі на тэрыторыі Расеі, патлумачылі «Інтэрфаксу» ў канцэрне «Белнафтахім».
«У сувязі з тым, што на лінейнай частцы нафтаправоду „Дружба“ на тэрыторыі Расеі ўзьнікла праблема, якая патрабуе экстранага рашэньня, беларускі бок сынхранізаваў рамонтныя работы на сваім участку, каб не ствараць дадатковага прыпыненьня транзыту нафты», — адзначыў прадстаўнік ведамства.
Напярэдадні кіраўніцтва «Гомельтранснафты» паведаміла пра рамонт дэфэктаў магістральных нафтаправодаў Унеча — Мазыр і Мазыр — Берасьце, а таксама пра рэканструкцыю тэхналягічных трубаправодаў на нафтаперапамповачнай станцыях «Кобрынь» і «Тураў». Работы плянуецца завершыць да канца тыдня.
«Зыходзячы са ступені небясьпекі дэфэктаў і мэтадаў рамонту, прынятае рашэньне аб зьніжэньні аб’ёмаў перапампоўкі на ўчастку Мазыр —Берасьце ў польскім кірунку з частковым вывадам асобных участкаў нафтаправоду», — адзначалася ў паведамленьні.
