Генэральная пракуратура вывучыла і накіравала ў Менскі гарадзкі крымінальную справу аб арганізацыі дамоўных футбольных і валейбольных матчаў, паведамляе сайт ведамства.
У якасьці абвінавачаных ў справе прыцягнулі 20 асобаў, якім інкрымінавалі супрацьпраўныя дзеяньні, пачынаючы ад лютага 2017 году да студзеня 2019-га ў розных спалучэньнях.
Сьледзтва выявіла 15 выпадкаў подкупу ўдзельнікаў прафэсійных спаборніцтваў, а таксама 12 фактаў, зьвязаных з ашуканскім завалоданьнем грашыма букмэкерскіх кантораў.
Абвінавачаным інкрымінавана, што яны перадалі, а спартоўцы футбольных і адной валейбольнай каманды прынялі незаконныя ўзнагароджаньні за загадзя абгавораныя вынікі.
Пасьля праверкі матэрыялаў крымінальнай справы ў Генэральнай пракуратуры прыйшлі да высновы аб абгрунтаванасьці абвінавачаньня.
Раней Сьледчы камітэт паведамляў, што ў рамках крымінальнай справы аб арганізацыі дамоўных матчаў выяўлена 28 эпізодаў супрацьпраўнай дзейнасьці — 16 подкупаў удзельнікаў прафэсійных спаборніцтваў і 12 фактаў махлярства, зьвязаных са стаўкамі на загадзя вызначаны вынік.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў