На паседжаньні 11 студзеня чальцы Цэнтральнай рады партыі «Беларуская сацыял-дэмакратычная грамада» ня толькі вызначылі патэнцыйнага кандыдата ў прэзыдэнты, але і вырашылі зьмяніць назву: цяпер проста «Грамада».
Цяпер назву «Грамада» будуць выкарыстоўваць у сацыяльных сетках і на сайце. Гэткая назва ўжо прапісаная ў статуце як «скарочаная», але раней партыйцы часьцей ужывалі абрэвіятуру БСДГ. Рашэньне зьмяніць гэта прынялі адзінагалосна. Адрас сайту Bsdg.by пакуль не мяняюць.
БСДГ была ўтвораная ў 1991 годзе, у 1996-м пад кіраўніцтвам Міколы Статкевіча аб’ядналася з Сацыял-дэмакратычнай партыяй Народнай згоды і атрымала назву БСДП «Народная грамада». БСДГ пазбавілі юрыдычных правоў, але ў 1998-м партыю аднавілі, яе старшынём стаў першы кіраўнік незалежнай Беларусі Станіслаў Шушкевіч.
У 2018 годзе лідэрам партыі стаў бізнэсовец і былы камуніст Сяргей Чэ́рачань, цяпер партыя вырашыла выстаўляць яго кандыдатам на прэзыдэнцкіх выбарах. Шушкевіч застаўся ганаровым старшынём Цэнтральнай рады партыі.
Пры тым у Беларусі ёсьць яшчэ дзьве «грамады».
- Афіцыйна зарэгістраваная БСДП (Грамада), заснаваная ў 2005 годзе пасьля таго, як улады пазбавілі рэгістрацыі БСДП (Народная грамада), атрымала афіцыйны статус. Лідэр — Ігар Барысаў.
- Незарэгістраваная «Народная грамада» — заснаваная ў 1996 годзе пасьля аб’яднаньня БСДГ і партыі Народнай згоды; пасьля пазбаўленьня рэгістрацыі ў 2005-м працягнула дзейнасьць і спрабавала вярнуць афіцыйны статус. Лідэр — Мікола Статкевіч, які таксама зьяўляецца лідэрам «Беларускага нацыянальнага кангрэсу».
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў