Лінкі ўнівэрсальнага доступу

Прэзыдэнт Абхазіі згадзіўся пайсьці ў адстаўку пасьля пратэстаў


Рауль Хаджымба, архіўнае фота

Прэзыдэнт самаабвешчанай рэспублікі Абхазія Рауль Хаджымба пагадзіўся пайсьці ў адстаўку. Як паведамляе карэспандэнт «Эхо Каўказа», адпаведна заява ўжо падпісаная і перададзеная прадстаўнікам апазыцыі.

Сёньня ж Цэнтральная выбарчая камісія Абхазіі прызначыла паўторныя выбары прэзыдэнта на 22 сакавіка. Пра гэта паведаміў журналістам старшыня выбаркаму Тамаз Гогія.

Напярэдадні Вярхоўны суд Абхазіі адмяніў вынікі леташняга галасаваньня. У верасьні, паводле афіцыйных вынікаў, лідэр апазыцыйнай партыі «Амцахара» Алхас Квіцінія зь невялікай розьніцай прайграў у другім туры прэзыдэнцкіх выбараў дзейнаму кіраўніку рэгіёну Раулю Хаджымбу.

У Абхазіі ўжо некалькі дзён працягваюцца масавыя пратэсты. Прадстаўнікі апазыцыі захапілі будынак адміністрацыі прэзыдэнта, забарыкадаваліся ў ім і патрабавалі адстаўкі Хаджымбы.

Абхазія, сэпаратысцкі рэгіён Грузіі, абвясьціла незалежнасьць пасьля вайны з Грузіяй у 1993 годзе. Расея пасьлядоўна падтрымлівала сэпаратысцкія настроі ў Абхазіі, а ў 2008 годзе пасьля пяцідзённай расейска-грузінскай вайны прызнала яе незалежнасьць. Грузія лічыць Абхазію і Паўднёвую Астыю тэрыторыямі, акупаванымі Расеяй, і абвінавачвае РФ у парушэньні тэрытарыяльнай цэласнасьці краіны і анэксіі яе тэрыторыі. У той жа час Расея аказвае вялікую дапамогу самаабвешчанай рэспубліцы і па афіцыйных, і па неафіцыйных каналах, а таксама дала пашпарты прыблізна 90% яе жыхароў.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG