Лінкі ўнівэрсальнага доступу

ЗША ўвялі санкцыі супраць парушальнікаў правоў чалавека


Ілюстрацыйнае фота

Адміністрацыя Дональда Трампа ўвяла эканамічныя санкцыі супраць больш як дзесяці асобаў з шасьці краін, якіх падазраюць у парушэньнях правоў чалавека, паведамляе «Голас Амэрыкі».

Аб’ява Міністэрства фінансаў ЗША аб увядзеньні санкцый супраць грамадзян Мʼянмы, Пакістану, Лібіі, Славаччыны, Паўднёвага Судану і Дэмакратычнай Рэспублікі Конга зробленая ў Міжнародны дзень правоў чалавека. Санкцыі «сфакусаваныя на асобах, якія забівалі або загадвалі забіваць нявінных людзей, што выступалі ў абарону правоў чалавека, у тым ліку журналістаў, дзеячоў апазыцыі і юрыстаў», заявіў намесьнік міністра Джастын Музініч.

Асобы, якія трапілі пад санкцыі, ня змогуць распараджацца ўласнасьцю або долямі ва ўласнасьці, якія знаходзяцца ў юрысдыкцыі ЗША і належаць ім цалкам або часткова.

Акрамя таго, Вашынгтон забараніў уезд у ЗША былому саудаўскаму дыплямату ў Турэччыне Мухамаду аль-Утайбі (у сувязі зь яго меркаваным дачыненьнем да забойства Джамаля Хашогі — саудаўскага журналіста, які жыў у ЗША і пісаў крытычныя артыкулы пра саудаўскую каралеўскую сям’ю) і кіраўніку ўпраўленьня МУС у Грозным Аслану Ірасханаву (які, паводле ЗША, нясе адказнасьць за сьмерць 27 чалавек).

У прыванасьці пад санкцыі трапілі:

  • камандзір узброеных сілаў М’янмы Мін Аўн Хлайн, які дапусьціў сурʼёзныя парушэньні правоў чалавека ў жніўні 2017 году, калі «прадстаўнікі этнічных меншасьцяў былі забітыя ці параненыя, часта падчас уцёкаў, салдатамі, якія выкарыстоўвалі буйную халодную зброю»,
  • лібійскі камандзір Махмуд аль-Варфалі, які ўзначальвае апалчэньне «Брыгада Ас-Сайка» — за ажыцьцяўленьне або даваньне загаду аб забойстве 43 бяззбройных затрыманых падчас асобных інцыдэнтаў з 2016 году, некаторыя зь якіх былі зьнятыя і апублікаваныя ў сацыяльных сетках.
  • у Славаччыне пад санкцыі трапіў Мар’ян Кочнер за пагрозы ў адрас журналіста Яна Куцяка, які расьсьледаваў карупцыйныя ўгоды Кочнера (мяркуюць, што Кочнер наняў былых супрацоўнікаў славацкай выведкі для сачэньня за Куцякам, які пасьля быў забіты).

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG