У Беларусі больш за 570 тысяч людзей з інваліднасьцю

У Беларусі цяпер пражываюць больш за 570 тысяч людзей з інваліднасьцю, паведаміў агенцтву «Минск-Новости» намесьнік міністра працы і сацыяльнай абароны Аляксандар Румак.

Паводле Мінпрацы, на 1 лістапада 2019 году ў Беларусі афіцыйна налічвалася 571,6 тысяч чалавек, якія атрымліваюць пэнсію па інваліднасьці. Гэта прынамсі кожны 17-ы жыхар краіны, калі сыходзіць з таго, што агульная колькасьць насельніцтва Беларусі — 9 мільёнаў 475 тысяч чалавек, паводле дадзеных Нацыянальнага статыстычнага камітэту на студзень 2019 году.

ГЛЯДЗІЦЕ ТАКСАМА:

Мазырскі вазочнік даслаў Лукашэнку фота, як выбіраецца на вуліцу. Праз вакно другога паверху

33 тысячы зь іх — гэта дзеці з інваліднасьцю. Пры гэтым, як адзначыў Аляксандар Румак, «колькасьць дзяцей з інваліднасьцю, на жаль, расьце».

200 тысяч зь іх — людзі працаздольнага ўзросту, але ня ўсе могуць працаваць па стане здароўя. Працоўную рэкамэндацыю маюць 113 тысяч чалавек, крыху больш за 60% зь іх працуюць.

ГЛЯДЗІЦЕ ТАКСАМА:

Інваліду-вазочніку, які ідзе ў дэпутаты, для сустрэч з выбарнікамі далі памяшканьне, куды яму цяжка трапіць

Беларусь у 2016 годзе далучылася да Канвэнцыі ААН аб правах людзей з інваліднасьцю, узяўшы на сябе абавязацельствы ствараць роўныя ўмовы для людзей з абмежаванымі магчымасьцямі, у тым ліку праз удасканаленьне заканадаўчай базы.

Ужо 2 гады ў Беларусі працуюць над законам «Аб правах інвалідаў і іх сацыяльнай інтэграцыі», цяпер на разгляд у парлямэнт цяпер перададзены праект закону, які мусіць адстойваць правы людзей з інваліднасьцю і найперш не дазваляць іх дыскрымінацыі.

Падчас абмеркаваньня закону з удзелам грамадзкіх арганізацый аспрэчвалася нават яго назва: «закон пра людзей з інваліднасьцю» або «закон пра інвалідаў», аднак дзяржаўныя органы ў выніку настаялі на тэрміне «інвалід», супраць якога выступалі грамадзкія арганізацыі.

ГЛЯДЗІЦЕ ТАКСАМА:

«Я хачу жыць...» Як чалавеку з інваліднасьцю выжыць у адным з найбяднейшых раёнаў Беларусі

У апошнія гады ў Беларусі пачалі працаваць над безбар’ерным асяродкам для людзей з абмежаванымі магчымасьцямі (пачалі ўсталёваць пандусы з поручнямі, кнопкі выкліку пэрсаналу ў грамадзкіх установах, пад’ёмнікі, адмыслова абсталяваныя прыбіральні і інш), аднак пакуль людзі з абмежаванымі магчымасьцямі па-ранейшаму маюць складанасьці пры самастойным перамяшчэньні праз адсутнасьць шмат дзе безбар’ернага асяродку.

ГЛЯДЗІЦЕ ТАКСАМА:

Людзям з інваліднасьцю не хапіла льготных білетаў на закрыцьцё Эўрагульняў

ГЛЯДЗІЦЕ ТАКСАМА:

Работнікі гомельскага прадпрыемства інвалідаў амаль два месяцы бяз працы і заробкаў

ГЛЯДЗІЦЕ ТАКСАМА:

Вазочнік набыў пандус для банку