У Чачэрску, што ў Гомельскай вобласьці, 1 лістапада затрыманы 24-гадовы беспрацоўны мясцовы жыхар, які, як сьцьвярджаюць праваахоўнікі, расфарбаваў балёнчыкам машыну і некалькі будынкаў, у ліку якіх храм і ратуша другой паловы XVIII стагодзьдзя.
Таксама ад вандала ў ноч на 29 кастрычніка пацярпелі брама могілак, аўтамабіль і хатка на дзіцячай пляцоўцы. У адным з надпісаў утрымлівалася імя: Юра.
Сьледчыя паклікалі экспэрта з Буда-Кашалёўскага міжраённага аддзелу камітэту судовых экспэртызаў, які зьняў змывы фарбы і іншыя сьляды, па якіх былі прызначаныя экспэртызы.
Цяпер матэрыялы перададзеныя ў Сьледчы камітэт для ацэнкі. І Спаса-Праабражэнская царква, і гарадзкая ратуша — аб’екты гісторыка-культурнай каштоўнасьці 1 катэгорыі.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў