Лінкі ўнівэрсальнага доступу

Расея выдала беларуса, якога шукалі за буйное махлярства


Ілюстрацыйнае фота

Расейскія сілавікі выдалі беларускім калегам 52-гадовага грамадзяніна Беларусі Мурата Сапарава. Яго шукалі ў Беларусі з 2012 году за махлярства ў буйным памеры, піша пракуратура Масквы.

Чаму шукалі?

Беларускія праваахоўнікі шукалі Сапарава за зьдзяйсьненьне злачынстваў па 7 артыкулах крымінальнага кодэксу, сярод якіх:

  • замах на махлярства;
  • арганізацыя махлярства;
  • арганізацыя замаху на махлярства.

Сапарава затрымалі ў жніўні 2018 году ў Маскве, ён знаходзіўся ў міждзяржаўным вышуку.

Крымінальнай справай займаецца Сьледчы камітэт па Менскай вобласьці.

Што зрабіў?

Паводле абвінавачваньня, Сапараў ў 2011 годзе, знаходзячыся ў Беларусі, разам зь іншымі асобамі праз падман і злоўжываньне даверам завалодаў 800 мяшкамі сухога малака масай 20 тонаў і агульным коштам 82 тысячы даляраў. Малако належала маскоўскай кампаніі «СЭБ „Правінцыял“». Мяхі з малаком даставілі ў Маскоўскую вобласьць, дзе саўдзельнікі распарадзіліся імі як лічылі патрэбным. Паводле пракуратуры Масквы, Сапараў спрабаваў завалодаць яшчэ 800 мяхамі малака, але ня змог.

Паводле сілавікоў, у 2011 годзе Сапараў таксама арганізаваў і прымаў удзел у дзейнасьці арганізаванай групы, якая займалася крадзяжом таварам у асабліва буйным памеры. Тавары мусілі адгружацца беларускімі вырабнікамі на адрас расейскіх і беларускіх субʼектаў гаспадараньня.

Група Сапарава шукала арганізацыі, якім была патрэбна грузаперавозка зь Беларусі ў Расею, атрымоўвала паўнамоцтвы на прыём тавараў і паведамляла кіроўцам іншае месца выгрузкі тавараў у Расеі. Такім чынам зламысьнікі скралі маёмасьць двух кампаній на больш за 543 мільёны недэнамінаваных рублёў і 7,3 мільёна расейскіх рублёў.

Таксама зламысьнікі спрабавалі завалодаць маёмасьцю камэрцыйных структур агульным коштам больш 1,5 мільярда недэнамінаваных беларускіх рублёў, аднак рэалізаваць гэта не атрымалася.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG