Як паведамляе агенцтва Reuters, японскі вытворца электронікі NEC Corporation, прадставіў прататып лятаючага аўтамабіля. Гэты прататып знаходзіўся ў паветры амаль хвіліну падчас выпрабаваньняў, якія праводзіліся ў Японіі на гэтым тыдні.
Памерамі транспартны сродак падобны на аўтарыкшу і падымаецца ў паветра дзякуючы чатыром гарызантальным прапэлерам прыкладна так, як гэта робяць дроны. Падчас выпрабаваньня, якое праводзілася на ўсходзе Токіё ў гэты панядзелак, лятаючая машына паднялася на тры мэтра ўвышыню.
Мяркуецца, што гэты апарат будзе выкарыстоўвацца для бесьпілётных палётаў – магчыма для даставак тавараў.
Японскія ўлады хочуць камэрцыялізаваць лятаючыя машыны пасьля 2023 года. Спачатку плянуюцца палёты з мэтай дастаўкі тавараў, але ёсьць верагоднасьць, што бліжэй да 2030 году яны ўжо будуць перамяшчаць людзей.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў