Паводле «Расейскай газэты», у Расеі прынялі новы закон, які дазваляе ствараць філіялы калёній-пасяленьняў пры прадпрыемствах, дзе ёсьць праца для зьняволеных.
Прадпрыемствы, якім патрэбныя працаўнікі-зьняволеныя, будуць мець магчымасьць абсталяваць агульнае жытло спэцыяльнага тыпу для таго, каб вязьні маглі там жыць пад аховай.
«Закон дазволіць вырашаць і сацыяльныя, і эканамічныя задачы — паведаміў старшыня праўленьня Асацыяцыі юрыстаў Расеі Ўладзімір Грузьдзеў. — Нярэдка прадпрыемствы ў раёнах з малым насельніцтвам адчуваюць недахоп працаўнікоў. Зь іншага боку, ёсьць відавочныя праблемы з працаўладкаваньнем асуджаных. Зараз зьявіцца магчымасьць адкрываць філіялы калёній-пасяленьняў і папраўчых цэнтраў пры прадпрыемствах і вялікіх будоўлях».
Філіялы будуць адкрывацца ў межах таго рэгіёну, дзе вязьні адбываюць пакараньне.
На 1 ліпеня 2019 году ў калёніях-пасяленьнях Расеі адбывалі пакараньне 33.3 тысячы асуджаных, паведамляе «Расейская газэта». Новы закон патэнцыйна зможа даць працу больш чым 6 тысячам вязьняў.
У сакавіку 2019 году Фэдэральная служба выкананьня пакараньняў Расеі пацьвердзіла, што ў мардоўскай калёніі №14 выкарыстоўваюць рабскую працу. Некаторых супрацоўнікаў і выканаўцу абавязкаў начальніка калёніі Юрыя Купрыянава адхілілі ад працы, супраць яго завялі крымінальную справу.
Пра рабскую працу ў калёніі №14 стала вядома яшчэ ў 2013 годзе, пасьля расповеду ўдзельніцы гурту Pussy Riot Надзеі Талаконікавай, якая адбывала там пакараньне. Сайт Idel.Реалии знайшоў іншых былых зьняволеных гэтай папраўчай калёніі. Ніна Мяжуева, якія праседзела ў мардоўскіх ІК-2 ды ІК-14 дзевяць гадоў за забойства, расказала пра свой досьвед. У калёнію яна трапіла ў 2008 годзе, а выйшла адтуль у 2017-м.
