Лінкі ўнівэрсальнага доступу

Пасол Беларусі ў Расеі выказаўся пра інтэграцыю


Уладзімер Сямашка

Уладзімер Сямашка папрасіў ня зьвязваць інтэграцыю з кампэнсацыяй Беларусі за расейскі падатковы манэўр.

Пасол Беларусі ў Расеі Ўладзімер Сямашка выказаўся наконт падатковага манэўру і інтэграцыі, ягоныя словы цытуе БелТА.

На думку пасла Беларусі, пытаньне кампэнсацыі за расейскі падатковы манэўр трэба вырашаць, але ня зьвязваць яго з паглыбленьнем інтэграцыі.

«Я лічу, што нельга зьвязваць адны рэчы з другімі, таму што тое, што насьпела ў межах іншых пагадненьняў, іншых дамоўленасьцяў, трэба вырашаць, і даўно трэба было вырашаць — ужо з 31 студзеня гэтага году», — сказаў пасол.

Уладзімер Сямашка адзначыў таксама, што расейскі і беларускі бакі знайшлі паразуменьне ў пытаньні кампэнсацыі падатковага манэўру. Але «расейскія калегі кажуць, што вырашыць гэта можна толькі пасьля паглыбленьня інтэграцыі».

Што важна ведаць пра расейскі падатковы манэўр

Нафтавы падатковы манэўр у Расеі — паступовая замена спагнаньня экспартнага мыта падаткам на здабычу карысных выкапняў (ПЗКВ). Экспартнае мыта будзе зьмяншацца адначасова з павелічэньнем ПЗКВ.

  • Расея пачала рэалізацыю падатковага манэўра зь 2019 году.
  • Да канца 2018 году экспарт сырой нафты ў Расеі абкладаўся экспартным мытам у памеры 30% ад цаны. Мыта не спаганялася з паставак на ўнутрырасейскі рынак і ў межах квоты ў Беларусь.
  • У 2017-2018 гадах квота на пастаўкі бязмытнай расейскай нафты для Беларусі складала 24 млн тон (18 млн тон перапрацоўвалі беларускаія НПЗ, 6 млн тон ішлі на рээкспарт).
  • Беларусь мела права абкладаць экспартным мытам свае нафтапрадукты, вырабленыя з расейскай бязмытнай нафты, якія прадавала ў трэція краіны. Беларускае мыта ішло ў беларускі бюджэт.

Страты і кампэнсацыя

  • У сьнежні 2018 г. у адміністрацыі Лукашэнкі сьцьвярджалі, што за 3 апошнія гады Беларусь недаатрымала $3,6 млрд, а за наступныя 4 гады недаатрымае $11 млрд пры найгоршым разьвіцьці падзей.
  • Паводле падлікаў рэйтынгавага агенцтва Fitch, наўпроставыя страты беларускай эканомікі складуць $10,6 млрд цягам 2019–2024 гг.
  • Дырэктар дасьледніцкага цэнтру ІПМ Аляксандар Чубрык падлічыў, што страты для бюджэту Беларусі ў 2019 годзе склалі $272,3 млн. ​
  • У кастрычніку 2018 Расея абяцала пералічыць у бюджэт Беларусі каля $405 млн у якасьці аплаты экспартнага мыта за нафту. Пазьней у кампэнсацыі адмовілі.
  • 18 сьнежня 2019 расейскі партал РБК паведаміў са спасылкай на свае крыніцы, што Расея кампэнсуе Беларусі страты ад манэўра праз зваротны акцыз для беларускіх НПЗ. Суму субсыдыяў ацанілі ў $1,5 млрд. Афіцыйнага пацьвярджэньня гэтай інфармацыі не было.

Кароткая гісторыя нафтагазавых канфліктаў Беларусі і Расеі

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG