У Стаўрапалі 27 траўня мясцовы жыхар з нажом напаў на супрацоўнікаў газэты «Родина», якая выдаецца мясцовай арганізацыяй Камуністычнай партыі Расейскай Фэдэрацыі і займае апазыцыйную пазыцыю ў адносінах да губэрнатара. Чацьвёра чалавек былі параненыя, паведаміў губэрнатар Стаўрапальскага краю Ўладзімір Уладзіміраў на сваёй старонцы ў сацсетках.
Паводле губэрнатара, нападнік быў затрыманы.
Дачка галоўнага рэдактара «Родины» Мікалая Бандарэнкі паведаміла ТАСС, што яе бацька атрымаў раненьні і яго праапэравалі:
«Апэрацыя прайшла пасьпяхова, стан нармальны. Шчака парэзаная нажом, [нападнік] хацеў трапіць у горла», — сказала яна.
Кіраўнік фракцыі КПРФ у Думе Стаўрапальскага краю Віктар Лазавы, які ў момант нападу быў у рэдакцыі, распавёў, што мужчына, які напаў на Бандарэнку і іншых супрацоўнікаў, знаходзіцца на псыхіятрычным уліку і быў незадаволены адмовай апублікаваць яго артыкул.
«13 траўня гэты мужчына прынёс артыкул пра Сталіна галоўнаму рэдактару і папрасіў апублікаваць яго. Адразу кажу, ён стаіць на ўліку ў псыхбальніцы, — распавёў Лазавы. — Сёньня ён прыйшоў з торбай, з пакетам, у пакеце быў загорнуты паляўнічы нож. Мікалай Федасеевіч [Бандарэнка] сказаў, што такія палітычна важныя тэмы абмяркоўваюцца на рэдакцыйнай калегіі, а [той] на гэта кажа: „Калі так, то я буду вас забіваць“».
Дачка галоўнага рэдактара са спасылкай на словы бацькі распавяла, што аўтар даслаў у рэдакцыю два артыкулы, але яны «не адпавядалі духу газэты і былі непісьменныя».
