Лінкі ўнівэрсальнага доступу

Улады ЗША прыпынілі авіязносіны з Вэнэсуэлай


Ілюстрацыйнае фота

У Міністэрстве ўнутранай бясьпекі ЗША гэтае рашэньне тлумачаць асьцярогай за бясьпеку пасажыраў і экіпажаў самалётаў, паведамляе Reuters.

Міністэрства транспарту ЗША 15 траўня прыпыніла выкананьне ўсіх камэрцыйных пасажырскіх і грузавых авіярэйсаў паміж Злучанымі Штатамі і Вэнэсуэлай на запыт зь Міністэрства ўнутранай бясьпекі. У афіцыйным лісьце гаворыцца, што «ўмовы ў Вэнэсуэле пагражаюць жыцьцю і бясьпецы пасажыраў, самалётаў і экіпажаў», якія выконваюць рэйсы ў краіну, ахопленую крызісам.

Большасьць буйных міжнародных перавозчыкаў спынілі палёты ў Вэнэсуэлу ўжо даўно — зь меркаваньняў бясьпекі, а таксама з прычыны запазычанасьці з боку Каракасу. Аднак некалькі вэнэсуэльскіх авіякампаній, уключна з Laser Airlines і Avior Airlines, да апошняга моманту працягвалі выконваць прамыя рэйсы паміж Маямі і Каракасам.

Вэнэсуэльскі авіяперавозчык Laser Airlines паведаміў, што рэйсы ў Каракас з Маямі будуць працягнутыя, аднак самалёты цяпер будуць рабіць дадатковую пасадку ў Дамініканскай рэспубліцы. У авіякампаніі паабяцалі працягнуць палёты ў Вэнэсуэлу з ЗША ў штодзённым рэжыме.

Прадстаўнікі авіякампаніі Copa Airlines, якая ажыцьцяўляе палёты з Каракасу ў Панаму з наступнай перасадкай на амэрыканскія рэйсы, у лісьце Reuters заявілі, што распараджэньне Міністэрства транспарту ЗША не адаб’ецца на працы кампаніі.

Амэрыканская авіякампанія American Airlines паведаміла аб спыненьні рэйсаў у Вэнэсуэлу «на няпэўны час» яшчэ ў сакавіку.

Што трэба ведаць пра крызіс у Вэнэсуэле

  • 23 студзеня на фоне канстытуцыйнага і эканамічнага крызісу ў Вэнэсуэле старшыня парлямэнту Хуан Гуайдо абвясьціў сябе часовым прэзыдэнтам і прынёс прысягу на мітынгу апазыцыі ў Каракасе. Апазыцыя не прызнала вынікаў прэзыдэнцкіх выбараў 2018 году, на якіх перамог дзейны прэзыдэнт Нікаляс Мадура.

Хто такі Хуан Гуайдо — новы лідэр апазыцыі Вэнэсуэлы, які абвясьціў сябе часовым прэзыдэнтам

  • Гуайдо прызналі законным прэзыдэнтам амаль усе краіны Лацінскай Амэрыкі (акрамя Балівіі і Кубы), ЗША, Аўстралія, Канада і Ізраіль. 31 студзеня «адзіным і законным часовым прэзыдэнтам» Вэнэсуэлы Гуайдо прызнаў Эўрапарлямэнт. Дзейнага прэзыдэнта Нікаляса Мадура лічаць легітымным Расея, Кітай, Куба і Мэксыка.
  • Беларускія ўлады заявілі, што «вэнэсуэльскі народ можа самастойна справіцца зь цяжкасьцямі, якія ўзьніклі, без ўмяшаньня звонку».
  • 26 сьнежня легітымным прэзыдэнтам краіны Гуайдо прызнаў вайсковы аташэ Вэнэсуэлы ў Вашынгтоне палкоўнік Хасэ Луіс Сілва. Ён стаў першым высокапастаўленым вайскоўцам і дыпляматам рэспублікі, якія пайшлі на такі крок. Большая частка высокапастаўленых чыноўнікаў і вайскоўцаў захоўваюць ляяльнасьць Мадура. ​
  • 28 студзеня ЗША ўвялі санкцыі супраць вэнэсуэльскай дзяржаўнай нафтавай кампаніі, каб узмацніць ціск на ўрад Мадура. Гуайдо заявіў, што бярэ кантроль над замежнымі актывамі Вэнэсуэлы, каб ня даць Мадура магчымасьці «спустошыць скарбонку».
  • У адказ Вярхоўны суд Вэнэсуэлы пачаў у дачыненьні да Гуайдо расьследваньне ў сувязі з «актамі гвалту, якія адбыліся ў краіне». Яму забаранілі выезд з Вэнэсуэлы і заблякавалі доступ да банкаўскіх рахункаў.
  • 29 студзеня Мадура заявіў у інтэрвію расейскім СМІ, што «гатовы сесьці за стол перамоваў з апазыцыяй».
  • Эканамічны крызіс у Вэнэсуэле цягнецца з 2013 году, калі да ўлады прыйшоў Мадура. Па эканоміцы краіны моцна ўдарыла падзеньне цэнаў на нафту, але ўлады вінавацяць у праблемах ЗША. За першы прэзыдэнцкі тэрмін Мадура інфляцыя склала больш як 2 000 000 000% (перад дэнамінацыяй цэны вымяраліся ў мільёнах), валавы ўнутраны прадукт зьменшыўся на 45%, з краіны эмігравала 10% насельніцтва — каля 3 млн чалавек. Сярэдняя вага вэнэсуэльца праз праблемы з харчаваньнем зьменшылася на 11 кг.
  • Вэнэсуэльцы рэгулярна выходзілі на акцыі пратэсту, у якіх бралі ўдзел дзясяткі тысячаў, а часам і сотні тысячаў чалавек. Праходзілі ня толькі палітычныя пратэсты, але і галодныя бунты. У сутыкненьнях гінулі людзі, самым крывавым стаў 2017 год, калі былі зафіксаваныя сьмерці 164 чалавек.
  • У 2016 годзе парлямэнт запусьціў працэдуру імпічмэнту Мадура, але імпічмэнт заблякаваў Вярхоўны суд, які пазьней фармальна пазбавіў улады Нацыянальную асамблею. У 2017 годзе Мадура склікаў Канстытуцыйную асамблею як замену парлямэнту, але яе не прызнала вэнэсуэльская апазыцыя і большасьць краінаў сьвету.
  • У 2018 годзе Мадура перамог на датэрміновых прэзыдэнцкіх выбарах, інаўгурацыя на другі 6-гадовы тэрмін прайшла 10 студзеня. Вынікі не прызнала апазыцыя, якая байкатавала выбары і абвясьціла «маральную перамогу». Таксама вынікі выбараў не прызналі ЗША, Канада, Аўстралія і шэраг краінаў Лацінскай Амэрыкі.

Падрабязьней >>>

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Вам можа яшчэ спадабацца

XS
SM
MD
LG