Украінскія памежнікі ў Жытомірскай вобласьці затрымалі мясцовага жыхара, які хацеў перанесьці празь дзяржаўную мяжу на тэрыторыю Беларусі скрыню з 150 папугаямі.
Пра гэта 5 красавіка паведаміла Памежная служба Ўкраіны (паведамленьне з фотамі).
Памежнікі, як паведамляецца, недалёка месца затрыманьня 45-гадовага меркаванага парушальніка мяжы выявілі вялікую скрыню, абсталяваную рамянямі для зручнасьці пераноскі. Усярэдзіне скрыні было шэсьць меншых скрынак з 150 папугаямі.
Птушкі былі канфіскаваныя і будуць перададзеныя супрацоўнікам фіскальнай службы. Кваліфікаваць учынак затрыманага будзе суд.
