Паліцыя ў Кітаі застрэліла кіроўцу пасьля таго, як ён на аўтамабілі ўрэзаўся ў пешаходаў, у выніку чаго загінулі шэсьць чалавек, яшчэ сямёра атрымалі раненьні і былі шпіталізаваныя, паведамляе Reuters са спасылкай на дзяржаўную тэлевізію КНР.
У справаздачы адзначаецца, што мужчына знарок пратараніў натоўп, аднак матывы яго дзеяньняў пакуль не вядомыя. Інцыдэнт адбыўся ў горадзе Заоян ў цэнтральнай правінцыі Хубэй.
У апошнія гады ў Кітаі адбылося некалькі падобных здарэньняў. Так, у верасьні 2018 году 11 чалавек загінулі і 40 атрымалі раненьні пасля наезду аўтамабіля на шматлюднай плошчы ў Паўднёвым Кітаі. Пасля ДТЗ кіроўца напаў на людзей з нажом і лапатай.
У апошнія гады падобныя тэракты з выкарыстаньнем аўтамабіляў ня раз адбываліся і ў краінах Эўразьвязу.
Так, у красавіку 2018 году, У цэнтры нямецкага гораду Мюнстэр на поўдні Нямеччыны грузавік урэзаўся ў натоўп людзей, у выніку загінулі тры чалавекі, 20 атрымалі раненьні.
У жніўні 2017 году 14 чалавек загінулі ў выніку наезду фургона на натоўп у цэнтры Барсэлёны.
Таксама ў 2017 годзе наезды на людзей тройчы адбыліся ў Лёндане і аднойчы ў Стакгольме, у 2016 годзе — у Бэрліне і Ніцы.
