У Пэнтагоне лічаць, што мадэрнізацыя ўзброеных сілаў Кітаю і Расеі дазваляе ім дзейнічаць хутка, каб паставіць ЗША перад фактам.
Расейскія вайсковыя стратэгі сур'ёзна вывучаюць магчымасьць ужываньня ядзернай зброі ў абмежаваных ваенных канфліктах, папярэдзіў высокапастаўлены амэрыканскі генэрал Кертыс Скапароці.
«Я думаю, што гэта частка расейскай дактрыны ды іхнага спосабу вядзеньня вайны, калі хочаце», — заявіў камітэту Палаты прадстаўнікоў у пытаньнях узброеных сілаў кіраўнік Эўрапейскага камандаваньня ЗША і галоўны вайскавод сілаў NATO ў Эўропе Кертыс Скапароці.
Гэтым ён адкідае здагадкі, што Расея распрацоўвае падобнае ўзбраеньне выключна для таго, каб устрывожыць Пэнтагон, які плянуе мадэрнізаваць ядзерныя сілы ЗША з улікам новых пагрозаў.
Прадстаўнікі Пэнтагону лічаць, што Расея, якая ня можа канкураваць з амэрыканскімі вайскоўцамі ў працяглым канфлікце з ужываньнем звычайных відаў зброі, разважае аб выкарыстаньні ядзернай зброі для хуткіх перамогаў над слабейшымі суседзямі, перш чым могуць умяшацца амэрыканскія войскі.
«Эскаляцыя з мэтай дамінаваць — вось як яны глядзяць на гэта, — заявіў Скапароці заканадаўцам. — І калі вы пагледзіце на мадэрнізацыю іхных сыстэмаў зброі сёньня, то, думаю, заўважыце, як яны могуць выкарыстоўвацца менавіта для гэтых мэтаў пры пэўнай эскаляцыі».
З гэтым пагадзілася цывільная калега Скапароці, адзначыўшы, што кітайскія вайсковыя стратэгі распрацавалі аналягічную тэорыю перамогі ў канфліктах. Абедзьве дзяржавы імкнуцца падвесьці ЗША да складанай дылемы.
«Мадэрнізацыя ўзброеных сілаў Расеі і Кітаю, у спалучэньні з праблемамі часу і адлегласьці, зь якімі мы сутыкаемся, даюць гэтым субʼектам магчымасьць дзейнічаць хутка, выкарыстоўваць тое, што звычайна называюць сцэнаром зьдзейсьненага факту, – заявіла выканаўца абавязкаў памочніка міністра абароны ў пытаньнях міжнароднай бясьпекі Кэтрын Ўілбарджэр. — Калі стане ясна, што выконваецца такі сцэнар, то ЗША апынуцца ў неспрыяльнай сытуацыі, калі ім прыйдзецца рэагаваць так, што гэта можа разглядацца як эскаляцыя канфлікту, а гэта вельмі праблематычнае разьвіцьцёпадзеяў пры канфрантацыі зь ядзернымі дзяржавамі».
Расея падмацоўвае гэтую стратэгію «актыўнымі запасамі, якія складаюцца з прыкладна 2 тысяч» збраёўных сыстэмаў, здольных дастаўляць «нестратэгічную», гэта значыць параўнальна невялікую ядзерную зброю, зазначыў Скапароці.
«Расейскія запасы нестратэгічнай ядзернай зброі выклікаюць заклапочанасьць, бо яны падтрымліваюць аблудную перакананасьць Масквы ў тым, што абмежаванае ўжываньне першымі ядзернай зброі, магчыма, маламагутнай, дасьць Расеі сілавую перавагу ў крызісах і на ніжэйшых узроўнях канфлікту», — сказаў ён.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў