Ва Ўкраіне з 1 лістапада 2018 цэны на газ для насельніцтва вырастуць на 23,5%, паведаміў прэм’ер-міністар Украіны Уладзімір Гройсман.
Ён падкрэсьліў, што цана вырасьце «ўсяго» на 23,5%, а «не на 60%».
«Гэта тое, чаго нам ўдалося неверагоднымі намаганьнямі дасягнуць у выніку перамоваў [зь Міжнародным валютным фондам — РС]», — сказаў Гройсман на пасяджэньні ўраду вечарам 19 кастрычніка і дадаў, што субсыдыямі будуць забясьпечаныя ўсе, хто ў іх мае патрэбу.
Украіна ў рамках супрацоўніцтва зь Міжнародным валютным фондам абавязалася перайсьці да рынкавых цэнаў, аднак летам і восеньню 2017 году адмовілася ад выкананьня гэтых абавязаньняў.
Пытаньне цаны на газ для насельніцтва зьяўляецца ключавым для аднаўленьня фінансаваньня Кіеву з боку МВФ.
