У Аргентыне спалілі какаін, выяўлены ў адным з будынкаў пасольства Расеі ў Буэнас-Айрэсе, паведамляе ТАСС.
Наркотыкі зьнішчылі ў крэматорыі. За працэдурай назіралі міністар бясьпекі Аргентыны Патрысія Бульрыч і амбасадар Расеі Дзьмітрый Феакцістаў. Бульрыч назвала «какаінавую справу» «вельмі складанай апэрацыяй з высокім узроўнем узаемадзеяньня».
У канцы лютага аргентынскія ўлады паведамілі, што ў школе пры пасольстве Расеі ў Аргентыне знайшлі 12 валізак з амаль 400 кіляграмамі какаіну. Яны былі зарэгістраваныя як дыпляматычны багаж. Каб вызначыць, хто мае дачыненьне да наркатрафіку, какаін замянілі на муку і адправілі ў Маскву.
Мэдыя паведамлялі, што для перавозу выкарыстоўвалі самалёт спэцыяльнага лётнага атраду «Россия», на якім лётае сакратар Савету бясьпекі Расеі Мікалай Патрушаў. У ведамстве гэтую інфармацыю назвалі «фэйкам». Але паліцыя Аргентыны пацьвердзіла сапраўднасьць здымкаў самалёта.
У так званай «какаінавай справе» арыштаваныя шэсьць чалавек — тры меркаваныя супольнікі кантрабандыстаў у Расеі, кіраўнікі фонду «Рускія праваслаўныя мэцэнаты ў Лацінскай Амэрыцы» Іван Блізьнюк і Аляксандар Чыкала ў Аргентыне. Меркаваны арганізатар паставак какаіну Андрэй Кавальчук перш быў затрыманы ў Нямеччыне, але ў канцы ліпеня яго выдалі Расеі.
