Лінкі ўнівэрсальнага доступу

Пэнтагон выключыў удзел танкаў у замоўленым Трампам вайсковым парадзе


Амэрыканскія вайскоўцы ў Кіеве на сьвяце з нагоды Дня незалежнасьці

Танкі ня прымуць удзел у вайсковым парадзе, правядзеньне якога даручыў арганізаваць прэзыдэнт ЗША Дональд Трамп. Цяжкую гусенічную тэхніку вырашана не задзейнічаць, каб мінімізаваць шкоду інфраструктуры Вашынгтона, у тым ліку дарожнага пакрыцьця, патлумачылі ў абаронным ведамстве.

У лютым Трамп аддаў распараджэньне Міністэрству абароны краіны і Беламу дому разгледзець магчымасьць правядзеньня вайсковага параду па аналёгіі з тым, што ён бачыў у Францыі ў Дзень узяцьця Бастыліі. «Я хачу парад, як у Францыі», — цытавала кіраўніка дзяржавы The Washington Post.

Напярэдадні Пэнтагон пацьвердзіў, што вайсковы парад адбудзецца ў сталіцы Злучаных Штатаў 11 лістапада, у нацыянальнае сьвята краіны — Дзень вэтэранаў. Шэсьце пройдзе ад Белага дома да Капіталійскага ўзгорка, дзе разьмяшчаецца Кангрэс ЗША. У канцы параду над Вашынгтонам павінны праляцець самалёты амэрыканскіх ВПС.

У мінулым месяцы кіраўнік адміністрацыйна-бюджэтнага кіраваньня Белага дома Мік Малвэйні заявіў, што кошт параду можа абысьціся бюджэту краіны ў суму ад 10 мільёнаў да 30 мільёнаў даляраў, у залежнасьці ад колькасьці вайскоўцаў і тэхнікі.

Апошні раз вайсковы парад праводзіўся ў Вашынгтоне ў 1991 годзе ў гонар перамогі ў вайне ў Пэрсыдзкай затоцы. У ім узялі ўдзел каля васьмі тысяч вайскоўцаў. За мерапрыемствам назіралі каля 200 тысяч гледачоў, паведамляе агенцтва Reuters са спасылкай на заяву Пэнтагона.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG