Лінкі ўнівэрсальнага доступу

Кіраўнік МЗС Нямеччыны падтрымаў ідэю стварэньня Злучаных Штатаў Эўропы


Міністар замежных справаў Нямеччыны Зыгмар Габрыэль

Міністар замежных справаў Нямеччыны Зыгмар Габрыэль падтрымаў прапанову лідэра Сацыял-дэмакратычнай партыі Нямеччыны Мартына Шульца стварыць Злучаныя Штаты Эўропы.

«Палітыкаў часта крытыкуюць за адсутнасьць уяўленьняў пра будучыню. Цяпер у кагосьці — а менавіта у Мартына Шульца — ёсьць ідэя аб тым, як Эўропа павінна разьвівацца ў далейшым, і вось усе адразу накінуліся на яго», — цытуе Габрыэля Deutsche Welle.

Кіраўнік сацыял-дэмакратаў Мартын Шульц на зьездзе сацыял-дэмакратаў 7 сьнежня прапанаваў да 2025 году пераўтварыць Эўразьвяз у Злучаныя Штаты Эўропы. На думку Шульца, у гэтага аб’яднаньня, у адрозьненьне ад ЭЗ, павінна быць агульная канстытуцыя.

У шэрагах нямецкіх кансэрватараў прагучала крытыка ідэі Шульца. Старшыня фракцыі Хрысьціянска-дэмакратычнага саюзу і Хрысьціянска-сацыяльнага саюзу у Бундэстагу Фолькер Каўдэр заявіў, што бачыць у прапанове «небясьпеку для ЭЗ і для згоды паміж грамадзянамі Эўропы». А кіраўнік ведамства фэдэральнага канцлера Пэтэр Альтмайер назваў ідэю кіраўніка сацыялдэмакратаў нерэалістычнай.

XS
SM
MD
LG