Пра гэта паведаміў адвакат Пудждэмона Поль Бэкар пасьля судовых слуханьняў у Брусэлі.
Паводле Бэкара, пракурор Бэльгіі патрабаваў ухваліць эўрапейскі ордэр на арышт Пудждэмона, аднак судзьдзя адклаў рашэньне да 4 сьнежня па просьбе абаронцаў. Калі суд прыме рашэньне аб выдачы гішпанскім уладам Пудждэмона і яго паплечнікаў, то яны змогуць абскардзіць рашэньне ў судзе другой інстанцыі. На разгляд скаргі адводзіцца 15 дзён.
Пасьля рэфэрэндуму аб незалежнасьці ў Каталёніі ўлады Гішпаніі ўвялі ў правінцыі прамое кіраваньне. Рэгіянальныя ўрад і парлямэнт адправілі ў адстаўку, на канец сьнежня прызначылі датэрміновыя выбары.
Нацыянальны высокі суд Гішпаніі выдаў міжнародны ордэр на арышт адхіленага ад улады кіраўніка Каталёніі Карлэса Пудждэмона і чацьвярых яго паплечнікаў. Супраць іх выставілі абвінавачаньні ў бунце і растраце бюджэтных сродкаў.
Мадрыд накіраваў запыт на іх затрыманьне ў пракуратуру Бэльгіі, дзе цяпер знаходзяцца згаданыя каталёнскія палітыкі.