Лінкі ўнівэрсальнага доступу

Ці хопіць 3000 расейскіх вайскоўцаў, каб захапіць Беларусь? Топ-10 цытатаў з круглага стала «Захад-2017»


Круглы стол Захад-2017.
Круглы стол Захад-2017.

14 жніўня ў гатэлі «Беларусь» прайшло паседжаньне круглага стала «Захад-2017», арганізаванае міжнародным фондам «Духоўная дыпляматыя». Яго прадстаўнік Юры Радзькоў падкрэсьліў, што стаяла задача арганізаваць гарачую дыскусію, таму сярод удзельнікаў — палітыкі і экспэрты, якія прадстаўляюць цалкам дыямэтральныя погляды.

На круглым стале спрачаліся паміж сабой дзьве групы выступоўцаў.

Першая — Алег Гайдукевіч, Мікалай Улаховіч, Мікалай Петрушэнка, Валер Ухналёў. Яны даводзілі, што манэўры «Захад-2017» мэтазгодныя і карысныя.

Другая — Ільля Дабратвор, Зьміцер Захарэвіч, Юлія Гарачка, Сяргей Спарыш. Яны сьцьвярджалі, што вучэньні нясуць пагрозу незалежнасьці Беларусі.

1. «Мы стратэгічныя партнэры з Расеяй, і замены гэтаму ня будзе. Як Расея патрэбная нам, так і мы патрэбныя Расеі. Якая гаворка можа ісьці пра ўвод войскаў ці пра нейкі захоп, калі мы супрацоўнічаем з Расеяй на ўсіх узроўнях і зьбіраемся ахоўваць як свае, так і яе межы?»

Мікалай Улаховіч, кіраўнік беларускага казацтва, лідэр Беларускай патрыятычнай партыі, дэпутат Палаты прадстаўнікоў
Мікалай Улаховіч, кіраўнік беларускага казацтва, лідэр Беларускай патрыятычнай партыі, дэпутат Палаты прадстаўнікоў

2. «Паводле Канстытуцыі Беларусь не ўваходзіць ні ў якія вайсковыя хаўрусы. Манэўры „Захад-2017“ — гэта перакос у бок Расеі, бо мы ж не зьбіраемся браць удзел у вучэньнях НАТО. У дадзеным выпадку ў нас знаходзяцца чужыя войскі чужой дзяржавы».

Ільля Дабратвор, грамадзкі актывіст
Ільля Дабратвор, грамадзкі актывіст

3. «Беларусь уваходзіць у АДКБ, вайсковы блёк, які ажыцьцяўляе адказнасьць на тэрыторыі часткі былых рэспублік Савецкага Саюзу. З гістарычнага пункту гледжаньня становішча Беларусі ня можа быць шматвэктарным. Я не магу дапусьціць, што Беларусь будзе кшталту Швайцарыі».

Яўген Сылка, вайсковы гісторык
Яўген Сылка, вайсковы гісторык

4. «У Дэклярацыі аб дзяржаўным сувэрэнітэце сказана, што Беларусь будзе імкнуцца зрабіць сваю тэрыторыю бязьядзернай зонай, а дзяржаву — нэўтральнай. Гэта па-першае. Па-другое, ёсьць сур’ёзныя прычыны для перасьцярогі, што расейскія войскі могуць увайсьці і ня выйсьці. Нагадаю ліпень 2008 году, калі расейскія войскі правялі вучэньні „Каўказ-2008“, пасьля чаго адбылося ўварваньне расейскіх войскаў у Грузію. Тое самае — Крым. Расейцы змаглі яго акупаваць, бо там былі разьмешчаныя расейскія вайсковыя базы. Таму пагроза небеспадстаўная».

Зьміцер Захарэвіч, рух салідарнасьці «Разам»
Зьміцер Захарэвіч, рух салідарнасьці «Разам»

5. «У манэўрах „Захад-2017“ будзе задзейнічана 12 700 вайскоўцаў. Сярод іх 3000, якія прыбудуць у Беларусь з Расеі. Няўжо вы лічыце, што 3000 вайскоўцаў і 4000 вагонаў, якія будуць перавозіць вайсковую тэхніку, будуць у стане захапіць незалежнасьць Беларусі?»

Уладзімер Грузьдзеў, намесьнік старшыні «Беларускага славянскага камітэту»
Уладзімер Грузьдзеў, намесьнік старшыні «Беларускага славянскага камітэту»

6. «Я служыў у Савецкай Арміі. Я ведаю, што такое 3000 салдат. Гэта ерунда, дробязь, тры палкі. Нічога яны не захопяць».

Мікалай Улаховіч, кіраўнік беларускага казацтва, лідэр Беларускай патрыятычнай партыі, дэпутат Палаты прадстаўнікоў
Мікалай Улаховіч, кіраўнік беларускага казацтва, лідэр Беларускай патрыятычнай партыі, дэпутат Палаты прадстаўнікоў

7. «Кажуць, што вучэньні „Захад-2017“ — актуальная тэма. Я нідзе ня чуў, каб людзі іх абмяркоўвалі: ні ў Беларусі, ні за мяжой. Што абмяркоўваюць людзі ў Беларусі? Хто багацейшы — куды паехаць адпачыць і тое, што ўвосень новы айфон выходзіць. Хто бяднейшы — як адправіць дзяцей у школу і сабраць ураджай. Каго цікавяць вучэньні? Журналістаў, палітыкаў і экспэртаў».

Алег Гайдукевіч, намесьнік старшыні ЛДПБ
Алег Гайдукевіч, намесьнік старшыні ЛДПБ

8. «Для нас захаваньне незалежнасьці — самае важнае. Але незалежнасьці не бывае бяз моцнай і прафэсійнай арміі. Таму мы і за тое, каб было больш вучэньняў. Але мы за захаваньне нэўтралітэту. Нельга, каб Беларусь была ўцягнутая ў які-кольвек збройны канфлікт».

Сяргей Спарыш, прадстаўнік БСДП(НГ)
Сяргей Спарыш, прадстаўнік БСДП(НГ)

9. «У сьвеце ёсьць толькі два буйныя вытворцы вайсковых тэхналёгій — Амэрыка і Расея. Мы павінны раз і назаўсёды вызначыцца, дзе ўзбройвацца. Мы заўсёды ўзбройваліся разам з Расеяй, за яе кошт. Расея нам дасьць найлепшыя расейскія самалёты. А на што нам сесьці? Хто нам зробіць самалёты? Трактарны завод? Выхад з АДКБ — гэта выхад з саюзу з Расеяй, канфрантацыя з Расеяй. Мы нічога не пабудуем, калі будзем рабіць гэта насуперак Расеі. Гэтаксама, калі мы будзем казаць, што расейская мова кепская — мы нічога не атрымаем».

Алег Гайдукевіч, намесьнік старшыні ЛДПБ
Алег Гайдукевіч, намесьнік старшыні ЛДПБ

10. «У Беларусі павінна быць падрыхтаваная армія. Вучэньні — неад’емная частка гэтай падрыхтоўкі. Я апытаў 32 чалавекі. 22 нічога ня чулі пра вучэньні. Толькі 2 чалавекі лічаць, што гэта праблема. Але казаць, што гэта праблема ўсёй грамадзкай супольнасьці, — гэта няпраўда, гэта не адпавядае рэчаіснасьці».​

Валер Ухналёў, намесьнік старшыні партыі «Справядлівы сьвет».
Валер Ухналёў, намесьнік старшыні партыі «Справядлівы сьвет».

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG