Інстаграм першай у гісторыі Беларусі кандыдаткі на пасаду прэзыдэнта, відаць, самы папулярны сярод інстаграмаў беларускіх палітыкаў. Амаль тры тысячы падпісчыкаў. Прычым сама Тацяна праглядае фотаздымкі толькі 631 чалавека.

Акрамя фота з працоўных сустрэчаў у інстаграме Тацяны Караткевіч шмат асабістага. Сэлфі з рэжысэрам Курэйчыкам і акторам Сухарукавым (Тацяна любіць кіно), фота ўласнаручна сабраных букетаў палявых кветак, дрэваў і здымкі з падарожжаў. Сярод апошніх вандровак – Стакгольм ды Кіеў. Ёсьць таксама фота з катамі і сабакамі ды здымкі з рок-канцэртаў. А яшчэ сэлфі з дыпляматкай Аленай Купчыной ды спэцдакладчыкам ААН аб правах чалавека Міклашам Харасьці.

Вельмі спартыўны акаўнт вядзе шматгадовы лідэр Аб’яднанай грамадзянскай партыі. Тут вам і марскія заплывы, і паездкі на ровары і нават спуск зь дзіцячай пляцоўкі. Палітык любіць водных птушак (адразу некалькі здымкаў з качкамі) ды кветкі (у самых розных праявах). З апошніх падарожжаў — паездка ў Бэрлін (здымак з Бундэстага) ды Стакгольм.

Падпісчыкі старшыні Партыі БНФ Аляксея Янукевіча могуць пабачыць, што ён любіць авіяцыю, матацыклы, архітэктуру беларускіх мястэчак, паходы ў тэатар і на рок-канцэрты. Таксама ў інстаграме Янукевіча шмат пэйзажаў, зробленых на берагах вадаёмаў, дарожныя фота (таксама са Стакгольму). Ёсьць здымак, зроблены падчас акцыі ў абарону Курапатаў. Сэлфі са славутасьцямі Аляксей, па ўсім відаць, ня вельмі любіць.

Адзін з кіраўнікоў «Гавары праўду» карыстаецца інстаграмам ва ўсю. Тут і справаздачы з агітацыйных паездак, і відэазвароты, і ўлёткі, і шмат іншых сьведчаньняў таго, што вы падпісаліся на актыўнага апазыцыянэра. У інстаграме Дзьмітрыева можна пабачыць здымкі кветак, коцікаў, сабачак і каляровых шкарпэтак. Як прынята ў інстаграм-карыстальнікаў, у Дзмітрыева ёсьць здымкі за абедам (сырнікі з малінавым варэньнем і хачапуры), у транспарце (трактар «Беларус» і электрычка) і сэлфі. Фатаграфуецца палітык у асноўным ў адзіноце, зь дзецьмі, альбо з паплечніцай Тацянай Караткевіч.

Сустаршыня аргкамітэту Беларускай хрысьціянскай дэмакратыі Віталь Рымашэўскі інстаграм завёў, але ім амаль не карыстаецца — усяго 13 здымкаў. І дарэмна, бо на акаўнт падпісаныя 808 чалавек — амаль удвая больш, чым у актыўнага карыстальніка Анатоля Лябедзькі.

Фота ў Віталя Рымашэўскага ў асноўным сямейныя. Шмат партыйнай сымболікі. Сэлфі ўсяго адно, але якое! На фоне міліцыянта, які складае пратакол, мала каму ўдавалася сфатаграфавацца.

Самы малады ўдзельнік нашага агляду — кіраўнік «Моладзі БНФ» Юрась Лукашэвіч. Тут няма здымкаў зь дзецьмі ды жонкай, затое дастаткова сэлфі са студэнцкіх імпрэзаў, вандровак, палітычных ды навуковых канфэрэнцый. Калі верыць інстаграму Лукашэвіча, часьцей за ўсё ён езьдзіць ва Ўкраіну, любіць творчасьць Зьмітра Вайцюшкевіча, абеды ў барысаўскіх сталоўках і сабак.

Інстаграму лідэра «Маладога Фронту» няма яшчэ і двух месяцаў, таму 194 падпісчыкі пры 26 фатаздымках можна лічыць посьпехам. Дашкевіч і тут ідзе супраць сыстэмы — палова з апублікаваных фота — гэта цытаты зь Бібліі па-беларуску і па-ангельску. Яшчэ ёсьць здымкі дзяцей, жонкі Насты, цясьлярскага рыштунку і нядаўняга параду ў Менску. Адпачынак праілюстраваны вынікам паходу ў лес па грыбы. Сэлфі пакуль адно — разам зь дзецьмі.