Лінкі ўнівэрсальнага доступу

У Кангрэсе адноўленая праца над законам аб санкцыях супраць Крамля


Эд Ройс, кіраўнік камітэту Палаты прадстаўнікоў у міжнародных справах

Кангрэс ЗША можа неўзабаве аднавіць працу над законапраектам аб санкцыях супраць расейскіх грамадзян і расейскіх кампаніяў, паведамляе інфармацыйнае агенцтва Reuters.

Яно спасылаецца на крыніцы ў Кангрэсе, паводле якіх паміж заканадаўцамі-рэспубліканцамі і дэмакратамі ў Палаце прадстаўнікоў вядуцца інтэнсіўныя дыскусіі, вынікам якіх можа стаць кампрамісны законапраект, што прадугледжвае ўзаконьваньне існуючых санкцый, увядзеньне санкцый за парушэньне правоў чалавека, кібэратакі і стварэньне базісу для санкцый у дачыненьні да расейскай горназдабыўнай, мэталюргічнай галінаў прамысловасьці, чыгуначнага і марскога транспарту. Адпаведны варыянт законапраекту ўжо ўхвалены Сэнатам, але яго рух у Палаце прадстаўнікоў быў прыпынены праз рознагалосьсі заканадаўцаў наконт некаторых непрынцыповых пунктаў гэтага дакумэнту. Супраць законапраекту рашуча выступае адміністрацыя Дональда Трампа, якая настойвала на тым, што ён створыць сур’ёзныя цяжкасьці ў стасунках з Расеяй.

Інфармацыя, што зьявілася ў апошнія дні, пра сустрэчу сына прэзыдэнта Трампа Дональда Трампа-малодшага з расейскай адвакаткай, якая нібыта мела дакумэнты, што кампрамэтуюць Гілары Клінтан, надала новы імпульс рабоце над законапраектам. Стэнлі Хоер, адзін з кіраўнікоў дэмакратычнай фракцыі, заявіў, што гэты дакумэнт можа быць прадстаўлены да галасаваньня ўжо на гэтым тыдні. Эд Ройс, рэспубліканец, кіраўнік камітэту Палаты прадстаўнікоў у міжнародных справах, паведаміў, што ён падасьць свой уласны законапраект, які прадугледжвае санкцыі супраць Расеі, калі цяперашняму варыянту гэтага біля не будзе дадзены ход.

XS
SM
MD
LG