Амэрыканскі сэнатар-рэспубліканец Джон Маккейн назваў прэзыдэнта Расеі Ўладзіміра Пуціна большай пагрозай для сусьветнай бясьпекі, чым экстрэмісцкая групоўка «Ісламская дзяржава». Пра гэта сэнатар заявіў у інтэрвію 30 траўня ў часе паездкі ў Аўстралію.
Маккейн выказаў надзею, што амэрыканскі Сэнат ўзмоцніць санкцыі ў дачыненьні да Расеі за яе ўмяшаньне ў прэзыдэнцкія выбары ў ЗША, у якім абвінавачваюць Крэмль. Расея ж, паводле яго, зьяўляецца «самым сурʼёзным выклікам», якія стаяць перад Злучанымі Штатамі.
Маккейн — даўні крытык Крамля і асабіста Уладзіміра Пуціна. Раней у траўні камэнтуючы сустрэчу прэзыдэнта ЗША Дональда Трампа з кіраўніком расейскага МЗС Сяргеем Лаўровым, сэнатар назваў апошняга «марыянэткай» Пуціна, які «бамбуе бальніцы ў Алепа», «урываецца ва Ўкраіну і адбірае Крым».