31 сакавіка зь СІЗА КДБ выйшлі Вячаслаў Дукшт, спэцназавец з Мар’інай Горкі, і Ільля Грэк, намесьнік начальніка па ідэалёгіі смаргонскага памежнага атраду. Абодва былі затрыманыя 21 сакавіка.
Зьвесткі «Вясны» пра вызваленьне з ізалятару КДБ спэцназаўца Вячаслава Дукшта і памежніка Ільлі Грэка пацьвердзіла Ніна Шыдлоўская.
«Яны па дамах, але пагаварыць зь імі журналістам не ўдаецца, бо яны і сваякі вырашылі не рабіць з гэтага розгаласу. Пра іх удзел у справе магу меркаваць гэтак: яны абодва з Бабруйску і яшчэ хлопцамі наведвалі ваенна-патрыятычны клюб „Патрыёт“, што было дастаткова даўно», — распавяла Ніна Шыдлоўская.
Нагадаем, што 31 сакавіка таксама быў адпушчаны Сяргей Барсток, а 1 красавіка — чатыры актывісты «Маладога фронту»: Дзьмітры Крамянецкі, Раман Васільеў, Арцём Леўчанка і Ўладзімер Яроменак.
У сьпісе затрыманых па справе аб падрыхтоўцы «масавых беспарадкаў» застаецца 21 чалавек. Вядома, што 10-ці зь іх ужо прад’яўленыя абвінавачваньні паводле ч. 3 арт. 293 Крымінальнага кодэксу РБ.
