Журналіста Дзяніса Носава вызвалілі, аднак забралі камэру і флэшкі, пратакол не складалі.
У Бярозе каля 20 чалавек прыйшлі на плошчу
Чатырох чалавек затрымалі міліцыянты. Абышлося без пратаколаў на ўдзельнікаў акцыі, але пратакол склалі на незалежную журналістку Тамару Шчапёткіну за працу на замежнае СМІ без акрэдытацыі.
Берасьце: 14 чалавек вызваленыя
«14 чалавек усяго было затрымана — усіх адпусьцілі, хаця два былі даволі агрэсіўныя, — распавядае Свабодзе рэдактар мясцовага сайту «Виртуальный Брест» Андрэй Кухарчык. —Было шмат адэкватных міліцыянтаў, але былі і неадэкватныя. На жанчыну накінуліся, сталі адбіраць у яе тэлефон, адзін трымаў галаву, другі торбу вырываў, трэці па кішэнях лазаў, гузікі адарвалі…»
У час затрыманьня згубілася ягонае журналісцкае пасьведчаньне. Працэс затрыманьня Кухарчык апісвае так:
«Я ўключыў жывую трансьляцыю — папярэдзіў, што пастараюся здымаць супрацоўнікаў міліцыі са сьпіны. У мяне праверылі мой пашпарт. Адышоў крыху далей — стаіць аўтазак, туды заводзяць людзей. Падышоў паглядзець, што там адбываецца, трансьляцыю не ўключаў. А мяне разам з тымі людзьмі ў аўтазак, хоць я паказваў: вось маё пасьведчаньне. Пасьведчаньне так і не вярнулі, ня могуць знайсьці».
Менск: АМАП чакае на Акадэміі
Каля менскай Акадэміі навук стаяць байцы АМАП, аўтазакі, а таксама праваабаронцы. Нягледзячы на паведамленьні ў сацсетках пра намер сабрацца а 14-й гадзіне, не падобна, каб пратэстоўцы выйшлі.
Берасьце: затрыманыя 13 чалавек
Паводле інфармацыі праваабаронцы Ўладзімера Вялічкіна, у Берасьці былі сёньня затрыманыя 13 чалавек, які знаходзіліся на плошчы Леніна, або праходзілі паўзь яе. Сярод затрыманых – рэдактар мясцовага сайту «Виртуальный Брест» Андрэй Кухарчык, актывіст Валер Фамінскі. Частка затрыманых дагэтуль знаходзіцца ў Ленінскім РАУС Берасьця, у дачыненьні іх складаюцца пратаколы, паведаміў праваабаронца. Уладзімер Вялічкін кажа, што імёны ўсіх затрыманых пакуль высьвятляюцца.
Толькі што на Нямізе затрымалі 5 чалавек.
За Палацам рэспублікі ў Менску таксама былі затрыманьні
Людзей затрымлівалі ў час акцыі на Кастрычніцкай, кагосьці затрымалі толькі што. Пра гэта кажуць у трансьляцыі «Белсату»:
У Віцебску затрыманы праваабаронца Павал Левінаў. Ен выйшаў на плошчу Перамогі разам з тымі, хто наважыўся прадэманстраваць незадавальненьне тым, што адбываецца ў краіне. Такіх людзей сабралася, паводле розных ацэнак, ад 100 да 200 чалавек. Пасьля быў затрыманы і праваабаронца Леанід Сьвецік. Таксама ў Віцебску затрыманыя незалежны журналіст Канстанцін Мардзьвінцаў і актывістка Ірына Трацьцякова.
У Мазыры затрымалі актывіста #пратэсты https://t.co/zUERFmziL1
— Радыё Свабода (@svaboda) 26.3.2017
У Бабруйску — больш за 30 затрыманых
У Бабруйску прайшла зачыстка кварталу, дзе зьбіраліся праводзіць акцыю пратэсту.
Міліцыянты выцягвалі людзей з кавярняў, забіралі тых, хто проста гуляў. Затрыманыя больш за 30 чалавек, перадае праваабарончы цэнтар «Вясна» ў сваім твітэры.
Затрыманых завезьлі ў Бабруйскі ГУУС, пакуль яны сядзяць у актавай залі.
Сярод затрыманых — некалькі журналістаў.
Рэдактар «Бабруйскага кур’ера» Анатоль Санаценка прыйшоў асьвятляць мерапрыемства. Там яго затрымалі амапаўцы і адправілі ў міліцэйскі аўтобус.
Таксама ў Бабруйску затрыманыя журналісты Андрэй Шобін, Віктар Масаловіч і Дзяніс Носаў.