Лінкі ўнівэрсальнага доступу

Невядомыя схапілі Зьмітра Дашкевіча ў жывым эфіры. Аказалася, міліцыя

абноўлена

Зьміцер Дашкевіч (зьлева) і невядомыя, якія схапілі яго на вуліцы

Лідэра «Маладога фронту» Зьмітра Дашкевіча схапілі невядомыя падчас жывой трансьляцыі, якую ён вёў праз Facebook. Напрыканцы відэа чуваць, як жанчына прадстаўляецца міліцыяй. Пасьля гэтага пачынаецца штурханіна і трансьляцыя абрываецца.

Дашкевіч знайшоўся. Яго вінавацяць у парушэньні, прынамсі, трох артыкулаў

Дзяжурны Першамайскага РАУС, куды мелі б адвесьці Дашкевіча, калі б яго затрымлівала міліцыя, заявіў Свабодзе, што «няма такога, не затрымлівалі», і параіў «патэлефанаваць у выцьвярэзьнік». Карэспандэнтка Свабоды знаходзіцца ў судзе Першамайскага раёну — канцэлярыя суду зьвестак не дае, іншыя супрацоўнікі кажуць, што пра затрыманьне Дашкевіча ня ведаюць.

Затрыманьне адбылося непадалёк ад Сядзібы БНФ, дзе пачаўся збор подпісаў пад адкрытым лістом да Міністэрства культуры з патрабаваньнем прыняць новы праект зонаў аховы мэмарыялу «Курапаты». У час падпісаньня Дашкевіч, ініцыятар абароны Купапатаў, казаў:

«Мажліва Шорац (старшыня Менгарвыканкаму – РС.) будзе шукаць іншых забудоўшчыкаў, у кожным выпадку, нам усім разам – сотням чалавек – нам атрымалася вывесьці тэму на агульнанацыянальны ўзровень абмеркаваньня».

Пасьля падпісаньня Дашкевіч выйшаў з пад’езду Сядзібы, накіроўваўся да аўтамабілю.

Невядомыя, якія схапілі Дашкевіча. Кадр з жывой трансьляцыі:

Празь некалькі хвілінаў пасьля затрыманьня старшыня Руху «За свабоду» Юры Габарэвіч выставіў у сваім профілі на Facebook відэа затрыманьня. Ён дадае, што пад Сядзібай БНФ застаецца стаяць сіні мікрааўтобус, вядомы па ранейшых затрыманьнях дэмакратычных актывістаў.

У дадзены момант тэлефон Дашкевіча не адказвае. Яго жонка Наста Дашкевіч сказала Свабодзе, што яе мужа, хутчэй за ўсё, даставяць у суд Першамайскага раёну, дзе над ім адбудзецца суд.

Глядзець камэнтары (14)

Гэтая дыскусія закрытая.
XS
SM
MD
LG