Пра ператрус у каардынатаркі праекту супраць карупцыі і катаваньняў у Расеі Gulagu.net Алены Абдулаевай паведаміў заснавальнік праекту Ўладзімір Асечкін на сваёй старонцы ў «Фэйсбуку». Ён напісаў, што ў кватэру да Абдулаевай прыйшлі сьледчыя.
Ад раніцы супрацоўнікі спэцслужбаў абшуквалі кватэру праваабаронцы Зоі Сьветавай. Як паведаміла раней Анна Ставіцкая, адвакатка Сьветавай, ператрус быў санкцыянаваны Басманным судом Масквы яшчэ 18 студзеня і праводзіўся па справе кампаніі «Юкос» і кіраванай Міхаілам Хадаркоўскім арганізацыі «Адкрытая Расея». Сьветава раней працавала ў арганізацыі «Рэпартэры бязь межаў» і ў «Фондзе Сорасу» ў Расеі.
Дырэктар праваабарончай арганізацыі «Міжнародная амністыя» ў Расеі Сяргей Нікіцін назваў сёньняшні ператрус у кватэры Зоі Сьветавай «вельмі трывожнай падзеяй». Паводле Нікіціна, Сьветава зьяўляецца адным з найбольш паважаных журналістаў і праваабаронцаў, і зусім незразумела, як яна можа быць зьвязана з крымінальным расьсьледаваньнем у дачыненьні да кампаніі «Юкос».
«Гэты ператрус для мяне — жудасны знак», — сказала Радыё Свабода расейская пісьменьніца Людміла Ўліцкая.
Ператрус у кватэры Сьветавай праводзіўся 12 афіцэрамі са Сьледчага камітэту Расеі, які займаецца расьследаваньнем сурʼёзных злачынстваў. Супрацоўнікі праваахоўных органаў прагледзелі кнігі і дакумэнты Сьветавай, а таксама спампавалі інфармацыю з электронных носьбітаў.
У сьнежні 2016 года супрацоўнікі Сьледчага камітэту Расеі правялі ператрусы ў кватэрах сямі супрацоўнікаў «Адкрытай Расеі», а таксама ў офісах у Маскве і Санкт-Пецярбургу. Сьледчы камітэт сьцьвярджае, што шукае доказы адмываньня грошай кіраўнікамі кампаніі «Юкос», якія зьвязаныя зь Міхаілам Хадаркоўскім.
