Лінкі ўнівэрсальнага доступу

Сытуацыя з тэлевізіяй Белсат робіцца ўсё больш заблытанай. Супярэчлівыя заявы польскіх чыноўнікаў, чуткі й плёткі ўнутры канала, зьмены настрою працоўнага калектыву ад панічных да пераможных і наадварот.

Дырэктарка Белсату Агнешка Рамашэўская кажа, што глядзець у будучыню зь нейкай пэўнасьцю пакуль зарана.

У кожным выпадку, пры самым горшым раскладзе, калі польскі бок канчаткова вырашыць адмовіцца ад падтрымкі канала, застануцца іншыя крыніцы фінансаваньня, праўда, гэта будзе ўжо зусім іншая мадэль тэлевізіі.

Але зірну на праблему крыху пад іншым вуглом.

У наш час і ў нашай інфармацыйнай прасторы на маёй памяці нараджаліся й зьнікалі куды больш цікавыя й маштабныя праекты. Прычым зьнікалі, фармальна застаючыся той самай маркай.

Калі хто памятае расейскі канал НТВ пачатку 1990-ых, той ведае, пра што вядзецца.

Больш творчы й мадэрновы праект цяжка прыгадаць. У каманды тагачаснага НТВ біў крэатыў, бруіла энэргія, бліскаў гумар і досьціп. Нават навіны на тым НТВ былі абсалютнай творчай лябараторыяй, яны глядзеліся не адно дзеля інфармацыі, але дзеля асалоды, як твор мастацтва.

Прыйшлі іншыя часы, канал пачалі забіваць, прычым забіваць з азіяцкай падступнасьцю, выпаліўшы ўсё нутро і замяніўшы іншым начыньнем. Крок за крокам ператварыўшы выдатны праект у тое, што мы бачым сёньня.

Вельмі прыкра назіраць, як нешта, што стала для цябе прыкладам у прафэсіі, кукожыцца й ніякавее на вачох. Як хто-ніхто з тых самых людзей, што дэкляравалі свабоду слова як адну з найважнейшых каштоўнасьцяў, спакойна чытаюць свае прапагандысцкія тэксты з экрана таго самага НТВ.

Можа крыху недасканалае параўнаньне, грубаваты прыклад, але мне здаецца, што і Белсат, як тэлеканал з пэўнай гісторыяй, гэтак і журналісты, што там працуюць, у той ці іншай ступені, таксама паўстануць перад праблемай выбару.

Белсат не НТВ, у яго ёсьць свае асаблівасьці і, на маю думку, непарушныя прынцыпы, першы й галоўны зь якіх – беларуская мова вяшчаньня.

Спакуса перавесьці канал на расейскую была й будзе, і тады тым людзям, якія там працуюць сёньня ці застануцца працаваць заўтра, таксама трэба будзе акрэсьліваць сваю пазыцыю.

Каб не было так, што тыя самыя журналісты, што дэкляравалі, умоўна кажучы, прынцып – беларуская мова перадусім, стануць спакойна чытаць свае тэксты з экрана Белсату на расейскай.

У іншым выпадку хай гэта будзе ўжо не Белсат.

Меркаваньні, выказаныя ў блогах, перадаюць погляды саміх аўтараў і не абавязкова адлюстроўваюць пазыцыю рэдакцыі.

Ваша меркаваньне

Паказаць камэнтары

XS
SM
MD
LG