Лінкі ўнівэрсальнага доступу

МУС Беларусі: Службовых асобаў Рассельгаснагляду падазраюць у дыскрэдытацыі дзелавой рэпутацыі беларускіх прадпрыемстваў


Міністэрства ўнутраных спраў Беларусі апублікавала заяву пра тое, што цяпер праводзіцца шэраг праверак «па дзеяньнях, якія зьмяшчаюць прыкметы злачынстваў, прадугледжаных артыкулам 249 Крымінальнага кодэксу Рэспублікі Беларусь ( „Дыскрэдытацыя дзелавой рэпутацыі канкурэнта“)».

У заяве гаворыцца, што МУС Беларусі «мае дадзеныя аб тым, што асобныя службовыя асобы Фэдэральнай службы па вэтэрынарным і фітасанітарным наглядзе Расійскай Фэдэрацыі (Рассельгаснагляд) у інтарэсах, не зьвязаных зь іх прафэсійнай дзейнасьцю, без наяўнасьці дастатковых падстаў і ў парушэньне нормаў міжнароднага права абмяжоўвалі магчымасьць рэалізацыі беларускай прадукцыі на тэрыторыі Расейскай Фэдэрацыі, а таксама ажыцьцяўлялі распаўсюд недакладнай інфармацыі, якая дыскрэдытуе айчынных вытворцаў».

Як прыклад, пішацца пра тое, што згодна з рашэньнямі Рассельгаснагляду толькі ў Менскай вобласці абмяжоўваліся пастаўкі з 96 сельскагаспадарчых прадпрыемстваў, прамыя страты якіх склалі больш за 5 мільёнаў рублёў.

«Па кожным матэрыяле будзе праведзена пільнае разбіральніцтва, а сабраныя доказы перададзеныя ў Сьледчы камітэт Рэспублікі Беларусь для дачы прававой ацэнкі,» — гаворыцца ў заяве.

Прадстаўнікі Рассельгаснагляду ў гутарцы з карэспандэнтам Радыё Свабода адмовіліся камэнтаваць заяву беларускага МУС.

На прэс-канфэрэнцыі 3 лютага Аляксандар Лукашэнка прапанаваў распачаць супраць кіраўніка Рассельгаснагляду Сяргея Данкверта крымінальную справу за перашкоды пастаўкам беларускіх харчоў.

«Ведаеце, рознага кшталту данкверты... Нам трэба вывучыць гэтае пытаньне, Ігар Анатолевіч [Шуневіч], і распачаць крымінальную справу, як некалі па Керымаву і Баўмгэртнэру. За нанясеньне ўрону дзяржаве. Распачаць крымінальную справу, і мы яго дастанем. Калі ён пабудзе ў СІЗА, ён будзе даваць сабе справаздачу, што ён робіць».

У Крамлі ў сваю чаргу выказалі неўразуменьне заявам пра крымінальны перасьлед Данкверта.

У той жа дзень было абвешчана, што Рассельгаснагляд з 6 лютага ўводзіць часовыя абмежаваньні на пастаўкі ялавічыны і ялавічных субпрадуктаў з усіх прадпрыемстваў Менскай вобласьці.


Артыкул 249. Дыскрэдытацыя дзелавой рэпутацыі канкурэнта

Распаўсюд індывідуальным прадпрымальнікам або службовай асобай юрыдычнай асобы ў рэкляме, сродках масавай інфармацыі і іншым спосабам заведама непраўдзівых зьвестак, якiя наносяць шкоду дзелавой рэпутацыі канкурэнта, — караецца штрафам, або папраўчымі работамі на тэрмін да двух гадоў, або арыштам на тэрмін да трох месяцаў, або абмежаваньнем волі на тэрмін да двух гадоў.

Глядзець камэнтары (4)

Гэтая дыскусія закрытая.
XS
SM
MD
LG