Лінкі ўнівэрсальнага доступу

«Лукашэнка паціху ідзе ад Пуціна»: расейскія і ўкраінскія СМІ пра прэсавую канфэрэнцыю Лукашэнкі


Параўнаем загалоўкі ўкраінскіх і расейскіх СМІ.

Амаль васьмігадзінная прэсавая канфэрэнцыя кіраўніка Беларусі трапіла на топы пераважнай большасьці расейскіх СМІ.

«Лукашэнка разыграў калгасны спэктакль», піша расейскі рэсурс Газета. ru, паводле якога «Аляксандр Лукашэнка выступіў з жорсткімі выказваньнямі на адрас Расеі, аднак заявіў, што ня бачыць небясьпекі акупацыі Расеяй Беларусі і мае сяброўскія адносіны з прэзыдэнтам Уладзімірам Пуціным. Выпад беларускага лідэра зьвязаны са стварэньнем зоны кантролю на мяжы і жаданьнем дамагчыся больш справядлівых, на думку беларускага боку, коштаў на газ».

Расейскае інфармацыйнае агенцтва «РИА-Новости» зьвяртае ўвагу на тое, што «Лукашэнка на прэс-канфэрэнцыі зьбіўся з думкі і папракнуў журналістаў» і прыводзіць прыклад, як «Аляксандар Лукашэнка праз прыкладна 90 хвілін пасьля пачатку вялікай прэс-канфэрэнцыі ў Менску зьбіўся з думкі, пасьля чаго заявіў журналістам, што яны яго ня слухаюць».

Расейскі інфармацыйны партал Lenta.ru апавядае, як «прэзыдэнт Беларусі забаўляў журналістаў» падчас прэсавай канфэрэнцыі — «Гальштук імпартны, трусы — свае».

«Аляксандар Лукашэнка расказаў пра набалелае», — піша расейскі «КоммерсантЪ», адзначаючы, што «спрэчка з Расеяй аб цане на газ закранула яго за жывое».

А вось на якія моманты зьвярнулі ўвагу ўкраінскіх СМІ.

«Расея ніколі не акупуе Беларусь. Як Лукашэнка правёў сваю вялікую прэс-канфэрэнцыю» — піша ўкраінская тэлевізійная служба навінаў TSN, якая сярод іншага зьвяртае ўвагу на тое, што Лукашэнка «абурыўся расейскім эмбарга на ўкраінскія тавары», а таксама назваў «Майдан плямай на ўкраінскім народзе».

«Лукашэнка паціху ідзе ад Пуціна, — палітоляг», — з такім акцэнтам падае інфармацыю пра прэсавую канфэрэнцыю беларускага кіраўніка ўкраінскі партал gazeta.ua.

А «Украінская праўда» найперш зьвяртае ўвагу на заяву кіраўніка Беларусі пра расейскую авіябазу ў Беларусі — «Лукашэнка пра авіябазу РФ у Беларусі: яна нам тут не патрэбная». І прыводзіць ягоную цытату «Мы не Ўкраіна, мы не антырасейскія, мы ў НАТО не імкнемся».

«Лукашэнка правёў найбольш працяглую прэсавую канфэрэнцыю», падсумоўвае ўкраінскі Міжнародны грамадзка-палітычны штотыднёвік ZN.ua, дадаючы, што за 22 гады пры ўладзе Лукашэнка ніколі не гаварыў так доўга.

Ігар Лосік Кацярына Андрэева Ірына Слаўнікава Марына Золатава Ягор Марціновіч

Самае папулярнае

XS
SM
MD
LG