Адстаўны генэрал марской пяхоты ЗША Джэймс Матыс, якога Дональд Трамп вылучыў на пасаду міністра абароны ЗША, заявіў, што ЗША павінны быць гатовыя супрацьстаяць паводзінам Расеі ў тых галінах, дзе абедзьве краіны ня могуць супрацоўнічаць, нават нягледзячы на прапанову Трампа ўзаемадзейнічаць з Масквой.
Пра гэта гаворыцца ў пісьмовым уступным слове генэрала на слуханьнях у сэнацкім Камітэце ў справах узброеных сіл на зацьвярджэньні яго кандыдатуры на пасаду кіраўніка Пэнтагону.
«Мы вялі справы з Расеяй нават у самыя цёмныя дні халоднай вайны, і я падтрымліваю жаданьне абранага прэзыдэнта ўзаемадзейнічаць з Расеяй у цяперашні час», — напісаў Матыс.
Ён таксама пацьвердзіў удзел Расеі ў хакерстве і інфармацыйнай вайне сярод іншых праблем, зьвязаных з Масквой. Ён назваў парушэньні Расеяй міжнародных дамоваў, выкарыстаньне тактыкі кароткіх войнаў для дэстабілізацыі іншых краін і «трывожныя паведамленьні з Масквы з нагоды выкарыстаньня ядзернай зброі».
Сэнатар Джон Маккейн, старшыня Камітэту ўзброеных сіл, сказаў, што ён «ня мог быць больш шчасьлівы» ў сувязі з вылучэньнем Матыса. Ён рашуча перасьцярог ад аптымізму што да ўзаемадзеяньня з прэзыдэнтам Расеі Ўладзімерам Пуцінам.
«Пуцін хоча быць нашым ворагам. Ён мае патрэбу ў нас як у сваім ворагу. Ён ніколі ня будзе нашым партнэрам...», — сказаў Маккейн у сваёй уступнай прамове. «Ён лічыць, што ўмацаваньне Расеі азначае аслабленьне Амэрыкі. Мы павінны дзейнічаць на гэтай аснове», — падкрэсьліў Маккейн.