Эўрапейскі гуманітарны ўніверсітэт (ЭГУ) у Вільні абвясьціў пра пачатак конкурсу на пасаду рэктара.
Міжнародны конкурс будзе ажыцьцяўляцца ад імя ЭГУ кансалтынгавым агенцтвам Mercuri Urval пад эгідай Шведзкага агенцтва міжнароднага супрацоўніцтва ў галіне разьвіцьця. Чакаецца, што новы рэктар заступіць на пасаду ў першай палове 2017 году.
Адабраны кандыдат будзе працаўладкаваны на 5 гадоў. «Асноўная задача рэктара — дзейнічаць ад імя ўнівэрсытэту і прадстаўляць ягоныя інтарэсы. Рэктар нясе адказнасьць перад Кіроўнай радай, а таксама наўпрост узаемадзейнічае з супрацоўнікамі адміністрацыі, кіруе шматнацыянальным акадэмічным і адміністрацыйным калектывам. Рэктар ёсьць цэнтральнай фігурай у структуры кіраваньня ўнівэрсытэтам; ён забясьпечвае, што інтарэсы ўсёй унівэрсытэцкай супольнасьці бяруцца пад увагу Кіроўнай радай у працэсе прыняцьця рашэньняў», — гаворыцца ў прэсавым рэлізе ЭГУ.
Апошні тэрмін падачы намінацыяў і заявак — 30 сьнежня да 12:00 паводле цэнтральнаэўрапейскага часу.
