У рэпартажы сьцьвярджаецца, што сацыялягічныя дасьледаваньні, вынікі якіх пэрыядычна публікуе НІСЭПД (Незалежны інстытут сацыяльна-эканамічных і палітычных дасьледаваньняў), — гэта фэйк, а грошы, якія выдзяляюцца інстытуту замежнымі партнэрамі, забіраюць сабе яго кіраўнікі.
Журналісты «Беларусь 1» заявілі, што яны прыйшлі да такой высновы на падставе дакумэнта з унутранай справаздачай НІСЭПД, які трапіў да іх выпадкова, а таксама на падставе інтэрвію зь людзьмі, якія, паводле дакумэнтаў інстытуту, бралі ўдзел у сацапытаньнях. На камэру гэтыя людзі адмаўляюць сваю датычнасьць да дасьледаваньня.
Экс-міністар працы, супрацоўнік НІСЭПД Аляксандар Сасноў сказаў Свабодзе, што матэрыял БТ не адпавядае рэчаіснасьці:
«На БТ сказалі, што ў НІСЭПД не праводзіцца ніякіх дасьледаваньняў. А хто-небудзь бачыў надрукаваныя вынікі сацыялягічных дасьледаваньняў ад дзяржаўных сацыялягічных службаў? Я — не. Дык вынікае, што дзяржава таксама прадукуе фэйкі».
Аляксандар Сасноў лічыць, што фільм «Прымат НІСЭПД», падрыхтаваны каналам «Беларусь 1», можа быць зьвязаны з выбарчай кампаніяй, якая выклікае ў грамадзтве цікавасьць да палітычных падзеяў:
«Можа, гэта зьвязана з выбарчай кампаніяй. А можа, знайшоўся чалавек, які захацеў нешта прыціснуць. Гэта ж як бывае. Калі ўзяць чалавека і прыціснуць яму пальцы дзьвярыма, дык ён што заўгодна на камэру скажа. Таму верыць БТ немагчыма».
