Сьпікер Вярхоўнай Рады Ўладзімір Гройсман адмовіўся ўзначаліць урад Украіны.
Пра гэта «Украінскай праўдзе» паведаміў дэпутат Мустафа Найем. Паводле яго слоў, цяперашні старшыня парлямэнта не захацеў пераходзіць на працу ва ўрад з-за таго, што ў працэсе перамоваў не былі выкананыя ўмовы па прапанаваных ім кандыдатурах.
Раней зьявіліся паведамленьні, што фракцыі «Блёка Пятра Парашэнкі» і «Народнага фронту» не прыйшлі да згоды з кандыдатам на пасаду прэм’ера Гройсманом па складзе кабінэта.
Таксама ў панядзелак стала вядома, што адэскі губэрнатар Міхаіл Саакашвілі звярнуўся да прэзыдэнта Ўкраіны Пятра Парашэнкі з патрабаваньнем сфармаваць урад народнага даверу пасьля адкрытага абмеркаваньня.
«Ніводнае абяцаньне рэформаў, дадзенае пасьля Майдану, выканана не было. Нас усіх водзяць за нос», - прыводзіць словы Саакашвілі выданьне. Палітык падкрэсьлівае, што звальненьне прэм’ер-міністра Арсенія Яцанюка не зьяўляецца рашэньнем праблемы карупцыі ва Ўкраіне. «Праблема ня толькі ў Яцанюку. Праблема ў падыходзе прэзыдэнта Ўкраіны да працэсу ўнутры краіны», - лічыць адэскі губэрнатар.
Міхаіл Саакашвілі таксама заявіў, што цэнтральныя ўлады перашкаджаюць працэсам рэфармаваньня ў Адэскай вобласьці.
Паводле яго слоў, калі на працягу бліжэйшых дзён ня будуць звольненыя карупцыянеры, і ня будзе сфарміраваны празрысты ўрад, то ўсе рэфарматары, у тым ліку адэскія, павінны сыйсьці з улады, перадае агенцтва УНП.