Першы намесьнік кіраўніка Міністэрства па надзвычайных сытуацыях Расеі Ўладзімер Сьцяпанаў на брыфінгу ў Маскве паведаміў, што пошукава-выратавальныя працы на месцы крушэньня блізу Растова-на-Доне пасажырскага самалёту Boeing кампаніі FlyDubai скончыліся.
Ён адзначыў, што ведамства акажа ўсю неабходную дапамогу Сьледчаму камітэту і прадстаўнікам кампаніі Boeing у справе вывучэньня частак самалёту для вызначэньня прычынаў крушэньня. Апроч таго, пачынаецца працэдура апазнаньня целаў загінулых і збор ДНК-матэрыялаў. Мэдыкі і псыхолягі аказваюць псыхалягічную дапамогу сваякам і працуюць з пасажырамі аб’яднаных рэйсаў, перанакіраваных у Краснадар і Мінэральныя Воды.
У расейскім МНС удакладнілі, што выратавальнікі паўторна праверылі месца трагедыі на плошчы 11 тысяч квадратных мэтраў у пошуках фрагмэнтаў целаў загінулых і асабістых рэчаў. У пошукавых працах былі задзейнічаныя больш за 700 выратавальнікаў.
19 сакавіка самалёт Boeing 737-800 авіякампаніі FlyDubai ня змог прызямліцца ў аэрапорце Растова і сьпікіраваў блізу ўзьлётна-пасадачнай паласы. На борце былі 62 чалавекі — 55 пасажыраў і 7 чальцоў экіпажу. Усе загінулі. Пераважная большасьць пасажыраў — расейцы, але таксама былі грамадзяне Ўкраіны, Індыі і Ўзбэкістану.
