Сэнатар Бэнджамін Кардзін лічыць, што прыпыненыя ўрадам ЗША санкцыі супраць дзевяці беларускіх кампаній трэба будзе аднавіць, калі ў Беларусі не адбудзецца дэмакратызацыі выбарчага працэсу.
Пра гэта, спасылаючыся на нядаўнія кансультацыі з актывістамі праваабарончага руху, сэнатар Кардзін напісаў у лісьце памочніку дзяржсакратара ЗША па пытаньнях Эўропы і Эўразіі Вікторыі Нуланд.
Паводле Кардзіна, у беларускім выбарчым працэсе патрэбныя: справядлівы і празрысты падлік галасоў; свабодны і справядлівы доступ да СМІ падчас выбарчай кампаніі; уключэньне прадстаўнікоў ўсіх кандыдатаў у выбарчыя камісіі; поўны доступ айчынных і замежных назіральнікаў да ўсіх этапаў выбарчага працэсу, уключна з падлікам галасоў; дазвольны прынцып рэгістрацыі арганізацый грамадзянскай супольнасьці.
Бэнджамін (Бэн) Кардзін (нар. 1943) зьяўляецца сэнатарам-дэмакратам ад штату Мэрылэнд. У 2006 годзе стаў старшынёй Хэльсынскай камісіі ЗША. У 1989-2007 быў кангрэсмэнам у Палаце прадстаўнікоў.
