Прэзыдэнт Украіны Пятро Парашэнка лічыць, што сапраўдная мэта Расеі — дэстабілізаваць становішча ва Ўкраіне.
«Гэта не вайна ўнутры Ўкраіны. Гэта агрэсія Расеі супраць Украіны толькі з адной мэтай — дэстабілізаваць сытуацыю і перашкодзіць праву ўкраінцаў жыць у Эўрапейскім зьвязе, рэалізаваць у краіне эўрапейскія каштоўнасьці і ня быць больш часткай Расейскай імпэрыі», — сказаў ён у панядзелак у інтэрвію агенцтву Bloomberg.
Пры гэтым, як паведамляе ягоная прэсавая служба, Парашэнка адзначыў:
«Расея разумее, што яна ня можа перамагчы ў гэтай вайне, таму што Ўкраіна мае вельмі магутны дух, аб’яднаную, як ніколі да гэтага часу, украінскую нацыю і глябальную салідарнасьць усяго сьвету з Украінай».
Камэнтуючы пытаньне санкцыяў у дачыненьні да Расеі, Парашэнка выказаў меркаваньне, што найбольш эфэктыўнымі санкцыямі зьяўляюцца сэктаральныя, уключаючы фінансавыя — плацёжныя сыстэмы, SWIFT і іншыя. «Мэта гэтых санкцыяў — не нанесьці разбуральнай шкоды Расеі, а толькі стварыць матывацыю, каб спыніць агрэсію, спыніць агонь, прастымуляваць выкананьне дамоўленасьцяў у галіне бясьпекі, эканамічнай, сацыяльнай, гуманітарнай і іншых сфэрах».
Парашэнка падкрэсьліў неабходнасьць укараненьня новых мэханізмаў забесьпячэньня міжнароднай бясьпекі. На яго думку, рашэньне аб разьмяшчэньні цяжкага ўзбраеньня ў постсавецкіх краінах і постсацыялістычных краінах — цяперашніх сябрах НАТО — «гэта мэханізм забесьпячэньня бясьпекі».
«Пасьля расейскай анэксіі Крыму і расейскай агрэсіі ў Данбасе глябальная сыстэма бясьпекі, заснаваная на рашэньнях Рады Бясьпекі ААН, больш не існуе. Сыстэма пасьляваеннай глябальнай бясьпекі была фактычна разбураная, паколькі сталы сябра Рады Бясьпекі ААН зьяўляецца агрэсарам», — лічыць прэзыдэнт Украіны.
«Усе павінны разумець, што Ўкраіна змагаецца ня толькі за сваю незалежнасьць і тэрытарыяльную цэласнасьць, а за свабоду і дэмакратыю, супраць агрэсара, які груба парушыў міжнародныя законы», — заявіў Пятро Парашэнка.
