У прэс-цэнтры Антытэрарыстычнай апэрацыі заяўляюць, што, паводле папярэдніх высноў экспэртаў, якія расьсьледуюць інцыдэнт з катэрам Дзяржаўнай памежнай службы Ўкраіны, які адбыўся 7 чэрвеня каля Марыюпаля, прычынай здарэньня стала самаробнае выбуховае прыстасаваньне, якое прынесла морам з боку акупаваных тэрыторыяў. Пра гэта гаворыцца на старонцы прэс-цэнтру АТА ў Фэйсбуку.
«Падчас агляду месца здарэньня і вывучэньня пашкоджанага катэра спэцыялісты прыйшлі да высновы, што выбухнула самаробнае выбуховае прыстасаваньне. Яно складалася з драўлянай крыжавіны, пенапляставых элемэнтаў і прадмета, падобнага на мэталічны цыліндар з маячком. Памежнікі, якія знаходзіліся на борце катэра, прынялі невядомы прадмет за радыёбуй і спрабавалі яго падцягнуць да судна. У гэты момант прылада спрацавала і пачуўся выбух, у выніку чаго катэр быў пашкоджаны, а асобы, якія знаходзіліся на яго борце, атрымалі раненьні рознай ступені цяжкасьці», — гаворыцца ў паведамленьні.
Сэпаратысты на сваіх сайтах інфармацыю не камэнтуюць.
У нядзелю, 7 чэрвеня, памежны катэр Марыюпальскага атраду марской аховы падарваўся на выбуховым прыстасаваньні ў Азоўскім моры, ля Азоўскага сударамонтнага завода. У катэры было сем чалавек, адзін чалавек загінуў. Па стане на вечар нядзелі яшчэ аднаго мужчыну шукалі, заявілі ў МУС.
