Лінкі ўнівэрсальнага доступу

Расейцаў непакоіць прыніжэньне ролі СССР у Другой сусьветнай вайне


Паводле апытаньня, якое на пачатку траўня правёў Усерасейскі цэнтар вывучэньня грамадзкай думкі (ВЦИОМ), 83% расейцаў лічаць патрэбным весьці барацьбу з фальсыфікацыямі гісторыі.

Перш за ўсё апытаных непакоіць прыніжэньне ролі СССР у Другой сусьветнай вайне. Іншыя прыклады «наўмыснага скажэньня гісторыі» рэспандэнты прыгадвалі радзей, і нават спрэчкі вакол асобы Іосіфа Сталіна турбуюць толькі 1%. Пра гэта паведамляе «Коммерсант».

Змагацца з фальсыфікацыяй гісторыі апытаныя прапануюць у першую чаргу з дапамогай данясеньня «праўды» праз СМІ (11%), падвышэньня якасьці выкладаньня гісторыі, дыялёгу (па 8%). Але ёсьць і тыя, хто хацеў бы «караць» фальсыфікатараў (8%). Былі і такія прапановы па барацьбе за гістарычную праўду, як увядзеньне сьмяротнага пакараньня за «наўмыснае скажэньне гісторыі Расеі» (2%) або дэпартацыя фальсыфікатараў (1%).

Аднак 43% рэспандэнтаў ВЦИОМ не змаглі адказаць на пытаньне, «у чым можа праяўляцца наўмыснае скажэньне гісторыі Расеі». Больш за ўсё — 19% — казалі аб такім шырокім паняцьці, як «скажэньне фактаў Другой сусьветнай вайны», 14% — аб прымяншэньні ролі Расеі ў ёй. 6% турбуе трактоўка «ўкраінскіх гісторыкаў, палітыкаў». Паводле супрацоўніка Інстытуту сацыялёгіі Расейскай акадэміі навук Лявонція Бызава, гэта тлумачыцца «інфармацыйнай палітыкай, калі людзі фармуюць сваё меркаваньне па нядаўна прагледжаных перадачах», а канкрэтныя факты ім ня вельмі цікавыя. У выніку за дарэвалюцыйную гісторыю турбуюцца 4%, за гісторыю Крыму — 2%. Па 1% прыгадалі пра спрэчкі вакол «асобы Леніна», «рэвалюцыі 1917 году, грамадзянскай вайны», «акупацыі Украіны савецкімі войскамі».

Глядзець камэнтары (4)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG