Фота дня:
Новае фота кожны дзень, увесь год. Прысылайце сюды свае здымкі гарадзкіх і прыродных краявідаў, падзеяў і зьяваў жыцьця ў 2015 альбо на пошту radiosvaboda@gmail.com. Пажадана дасылаць фота ў прапорцыі 16 на 9. Усе аўтары фота, апублікаваных на сайце Свабоды, атрымаюць прызы. Тры найбольш папулярныя здымкі месяца будуць адзначаныя асобна.
Афіша:
У «Менск-Арэне» пройдуць фінальныя спаборніцтвы чэмпіянату Эўропы па мастацкай гімнастыцы. Пачатак спаборніцтваў а 11.00.
Вільня – шпацыр па беларускай Вільні. Арганізоўвае Віленскі беларускі музэй імя Лявона Луцкевіча. Пачатак а 11-ай ад Вострай Брамы. Тэлефон для кантактаў +37064643878 (Валерыя)
У гісторыі:
1620 — нарадзіўся Багуслаў Радзівіл, вайсковы і дзяржаўны дзяяч Вялікага Княства Літоўскага, мэцэнат.
1791 — Сойм Рэчы Паспалітай зацьвердзіў першую ў Эўропе Канстытуцыю.
1877 — нарадзіўся Антон Грыневіч, зьбіральнік беларускага музычнага фальклёру, выдавец. Загінуў у ГУЛагу.
1882 — нарадзіўся Ўладзіслаў Галубок, беларускі драматург, актор і рэжысэр, заснавальнік беларускага савецкага тэатру. Загінуў у ГУЛагу.
1953 — нарадзіўся Франц Сіўко, беларускі празаік, публіцыст. Ягоны артыкул у «ЛіМе» ў 1986 годзе «Прашу вызваліць...» пра вывучэньне беларускай мовы ў школах выклікаў дыскусію і зварот дзеячоў культуры да Генэральнага сакратара ЦК КПСС Міхаіла Гарбачова.
1991 — у сталіцы Намібіі прынятая «Віндгукская дэклярацыя», якая заклікала ўрады дзяржаў усяго сьвету забясьпечваць свабоду прэсы. Дзень па рашэньні ЮНЕСКА адзначаецца як Сусьветны дзень свабоды друку.
У памяці:
1864 — памёр Станіслаў Горскі, беларускі прыродазнавец, мэдык, пэдагог.
Цытата:
Канстытуцыю далі,
Адчынілі дзьверы,
I... ў астрог нас павялі,
I таўкуць безь меры.
Вітэ нам дакляраваў —
Помніце? — свабоду.
Потым фігу паказаў
«Вернаму» народу.
Зашумелі аб зямлі
Ў Думе дэпутаты,
Ды па карку ім далі —
I пайшлі дахаты.
Архірэй наш Міхаіл
Тураўскі і Мінскі
Чорнай сотні толькі міл,
Бо робіць па-сьвінскі.
Ганчакамі па Русі
Прыставы лятаюць,
Нас цкуюць: «Кусі, кусі!» —
Як зайцоў, страляюць.
Разьвялося стражнікоў,
Як якой жывёлы,
Ад іх плешак і шнуроў
Чырванеюць сёлы.
Колькі ўсякіх строгіх мер —
Канца няма, краю!
Канстытуцыю цяпер,
Як пяць пальцаў, знаем.
Якуб Колас, "Канстытуцыя"