«Павел Губараў выкрадзены. Што зь ім і дзе ён мы, сапраўды, у дадзены момант не ведаем. Гэта адбылося некалькі гадзінаў таму» — паведамілі ў панядзелак увечары «Інтэрфаксу» прадстаўнікі прэсавай службы Губарава.
Напярэдадні шэраг украінскіх СМІ распаўсюдзілі інфармацыю аб арышце Губарава.
Сёньня ў Фэйсбуку Губарава зьявіўся запіс, падпісаны кіраўніком «Фонду дапамогі Наваросіі» Глебам Карнілавым: «Толькі што паведамілі з Данецку. Павел Губараў захоплены невядомымі байцамі. Па словах відавочцаў, аўтаматчыкі ў масках заляцелі ў штаб, паклалі тварам уніз яго ахову. Губарава вывелі, загрузілі ў машыну і павезьлі ў невядомым кірунку. Адзін з удзельнікаў здарэньня запэўнівае, што гэта былі чачэнцы па характэрнай гаворцы».
У пачатку сакавіка 2014 году падчас мітынгу ў Данецку Павел Губараў быў абраны так званым «народным губэрнатарам» Данецкай вобласьці. Пры ўдзеле Губарава мітынгоўцы некалькі разоў захоплівалі будынак абласной адміністрацыі.
6 сакавіка 2014 году ён быў арыштаваны ўкраінскімі спэцслужбамі. У маі 2014 года Губарава ў ліку іншых арыштаваных абмянялі на трох афіцэраў украінскай «Альфы», а ў чэрвені 2014 году абвясьцілі ў вышук на тэрыторыі Ўкраіны. Неўзабаве пасьля вызваленьня з-пад арышту Губараў абвясьціў аб стварэньні партыі «Наваросія» і ўзначаліў яе.