Лінкі ўнівэрсальнага доступу

Ужо сёньня, 16 студзеня. Сусьветны дзень «The Beatles», юбілейная імпрэза «Літаратурнай Беларусі»


ФОТА ДНЯ. Анастасія Арол, заход сонца на Браслаўскіх азёрах, 2014

Бліц-агляд падзеяў і датаў гэтага дня.

Новае фота кожны дзень, увесь год. Прысылайце сюды свае здымкі гарадзкіх і прыродных краявідаў, падзеяў і зьяваў жыцьця ў 2015. Пажадана дасылаць фота ў прапорцыі 9 на 16. Усе аўтары фота, апублікаваных на сайце Свабоды, атрымаюць прызы. Тры найбольш папулярныя здымкі месяца будуць адзначаныя асобна.

Афіша:

Сусьветны дзень «The Beatles».

У менскай галерэі «Ў» (пр. Незалежнасьці, 37а) адбудзецца юбілейная імпрэза з нагоды выхаду сотага нумару часопісу «Літаратурнай Беларусі». У імпрэзе возьмуць удзел пісьменьнікі Алесь Пашкевіч, Андрэй Хадановіч, Уладзімер Арлоў, Анатоль Вярцінскі, Уладзімер Някляеў і іншыя. Пачатак а 18-й гадзіне.

На сёмай пазачарговай сэсіі Савету Рэспублікі Нацыянальнага сходу маюць даць згоду на прызначэньне прэзыдэнтам новага старшыні праўленьня Нацыянальнага банку.

У межах кампаніі «Будзьма!» ў сядзібе Таварыства беларускай мовы адбудзецца прэзэнтацыя новай кнігі доктара гістарычных навук Алеся Краўцэвіча «Краіна Пагранічча». Пачатак а 17-й гадзіне.

У гісторыі:

27 год да н. э. — 1-й консул Рымскай рэспублікі Актавіян Аўгуст стаў першым рымскім імпэратарам.

1916 — фэльдмаршал Гіндэнбург выдаў загад пра наданьне беларускай мове раўназначных правоў зь іншымі мовамі, пашыранымі на тэрыторыях, акупаваных войскамі Нямеччыны.

1919 — праз два тыдні пасьля абвяшчэньня БССР тэрыторыя савецкай Беларусі была радыкальна зьменшаная на карысьць Расейскай Фэдэрацыі. У склад РСФСР былі забраныя Віцебская, Магілёўская і Смаленская губэрні.

1920 — У ЗША пачаў дзейнічаць «сухі закон».

1921 — падпісаная саюзная дамова паміж БССР і РСФСР.

1963 — Мікіта Хрушчоў абвясьціў, што СССР мае вадародную бомбу.

1969 — чэскі студэнт Ян Палах спаліў сябе ў Празе на Вацлаўскай плошчы на знак пратэсту супраць савецкага ўварваньня ў 1968 годзе.

1979 — перамога ісламскай рэвалюцыі ў Іране, у выніку пратэстаў шах Мухамад Рэза Пэхлеві пакідае краіну.

У гэты дзень нарадзіліся:

1791 — Генрык Дэмбінскі, адзін з кіраўнікоў паўстаньня 1830-1831 гадоў. У 1831-м кіраваў няўдалай спробаю адбіць у расейцаў Вільню і скончыў жыцьцё ў эміграцыі.

1826 — Рамуальд Траўгут, адзін з кіраўнікоў паўстаньня 1863-1864 гадоў. Быў схоплены і павешаны. У мястэчку Сьвіслач на Гарадзеншчыне яму пастаўлены помнік.

1905 — Алесь Пальчэўскі, беларускі пісьменьнік. За сталінскім часам быў двойчы рэпрэсаваны.

1919 — Уладзімер Алоўнікаў, беларускі кампазытар, народны артыст Беларусі. Сярод створаных ім папулярных песьняў — «Радзіма мая дарагая».

1943 — Мікола Чарняўскі, беларускі пісьменьнік, аўтар шматлікіх кніг для дзяцей, доўгія гады супрацоўнік часопісаў «Бярозка» і «Вясёлка».

1947 — Леанід Захлеўны, беларускі кампазытар, народны артыст Беларусі.

Цытата:

— Баліць моцна?
— Баліць, але чалавек павінен супраціўляцца злу усімі сродкамі, якія яму даступныя.

З размовы з доктарам у шпіталі паміраючага Яна Палаха пасьля яго самаспаленьня

XS
SM
MD
LG