Гомель: прадпрымальнікі знайшлі альтэрнатыву «Сакрэту»

Часовае замірэньне прадпрымальнікаў Гомельскага гандлёвага цэнтру «Сакрэт» і новага ўласьніка памяшканьняў — менскага таварыства з дадатковай адказнасьцю «НП-Сэрвіс» — наконт рэзкага падвышэньня арэнднай платы цягнулася толькі два месяцы.

22 траўня дробныя бізнэсоўцы зноў сабраліся на сход, каб радыкальным чынам пазбавіцца ад паўзучых высокіх коштаў на арэнду. Прадпрымальнікі вырашылі ўзяць удзел у будаўніцтве новага гандлёвага цэнтру. На такі крок, паводле сябра рады прадпрымальнікаў гандлёвага цэнтру "Сакрэт«Аксаны Селюковай, бізнэсоўцы ідуць зусім не ад добрых стасункаў з уласьнікам:

«На 250 адсоткаў павялічана арэндная стаўка фірмам, арганізацыям і тым прадпрымальнікам, якія першапачаткова добраахвотна й без вайны падпісалі дамовы. У выніку людзі трапілі ў даўгавыя ямы. Прыходзяць да нас пастаянна й кажуць, што штрафныя санкцыі і пеню ім налічылі астранамічныя — 16, 20, а то й 28 мільёнаў. Я кажу вам гэта афіцыйна. У людзей валасы дыбарам устаюць».



Не спадзяюцца на нейкую палёгку й тыя прадпрымальнікі, якім у выніку нядаўніх пратэстаў удалося да сакавіка будучага году дамагчыся толькі 25-адсоткавага падвышэньня кошту арэнды. Апрача таго, кампанія «НП-Сэрвіс» патрабуе цяпер ад прадпрымальнікаў падпісаць дадатковае пагадненьне. Рэч у тым, што ўласьнік заклаў маёмасьць гандлёвага цэнтру пад іпатэку, і калі «Белгазпрамбанк» яе забярэ, то, паводле гэтага пагадненьня, дамовы арэнды гандлёвых плошчаў могуць быць наагул скасаваныя. Іншымі словамі, дробныя бізнэсоўцы рызыкуюць апынуцца на вуліцы.



Усё гэта й вымусіла прадпрымальнікаў ставіць перад уладамі пытаньне наконт будоўлі ўласнага ці долевага гандлёвага цэнтру, каб не трапляць у татальную залежнасьць ад манапаліста.



Юрыст Дзьмітры Зайцаў паведаміў на сходзе, што горад вызначыў тры пляцоўкі, дзе можна будзе ўзьвесьці новы гандлёвы цэнтар:

«Управай архітэктуры й горадабудаўніцтва на сёньня прапанаваныя тры пляцоўкі, які знаходзяцца вакол цэнтральнага рынку. Першая — гэта скрыжаваньне вуліц Катуніна й Карповіча, у раёне харчовага рынку. Другая пляцоўка — гэта плошча, сумежная з гандлёвым цэнтрам „Сакрэт“ і цэнтрам „Эўропа“. Цяпер тут паркоўка й частка прыватнага сэктару, якую трэба будзе зносіць. І трэцяя пляцоўка — гэта скрыжаваньне вуліц Гагарына й Ветранай, дзе можна пабудаваць гандлёвы цэнтар на 5 тысяч квадратных мэтраў».

Пратакол згоды на ўдзел у будаўніцтве новага цэнтру падпісалі адразу пасьля сходу 38 прадпрымальнікаў, у іх ліку й спадарыня Ірына:

«Ва ўсякім разе, трэба штосьці рабіць, да чагосьці імкнуцца. Арэнда й камунальныя плацяжы падымаюцца на такія працэнты, што гэта проста немагчыма. І стаўленьне „НП-Сэрвіс“ — яны проста ня хочуць з намі размаўляць. Ставяць умовы — і ўсё тут».



Старшыня рады прадпрымальнікаў-арандатараў «Сакрэту» Натальля Дасько так пракамэнтавала сёньняшнюю ініцыятыву прадпрымальнікаў:

«Адзіны гандлёвы цэнтар існуе ў горадзе, уласьнік якога — манапаліст. Ён што хоча, тое й робіць — выстаўляе якія заўгодна кошты. З-за гэтага ў нас столькі праблемаў! Мы ня можам працаваць спакойна й плянаваць свой бізнэс. Патрэбна альтэрнатыва. Мы прасілі гэта ў гораду, і горад пагадзіўся нам яе даць».