Лінкі ўнівэрсальнага доступу

ВАЛЕРЫ ЛЕВАНЕЎСКІ ЗАКЛІКАЕ ПРАДПРЫМАЛЬНІКАЎ СТРАЙКАВАЦЬ ДА ПОЎНАЙ ПЕРАМОГІ


Сяргей Астраўцоў, Горадня

Усё пачалося са сходу прадпрымальнікаў на самым буйным рынку—на “Паўднёвым”. Удзельнікі абмяркоўвалі саступкі, зробленыя абласнымі ўладамі. Улады адклалі ўвядзеньне касавых апаратаў да 1 сьнежня, абмежаваўшы іх выкарыстаньне толькі гандлёвымі павільёнамі.

Частка прадпрымальнікаў вырашыла, што з 16 кастрычніка можна выйсьці на працу і працягваць перамовы з уладамі. Аднак Валеры Леванеўскі заклікаў страйкаваць да поўнай перамогі. Ён таксама прапанаваў сабрацца на пляцы Леніна і выклікаць на размову гарадзкое і абласное начальства.

Чалавек 200 сапраўды сабраліся а 12-й гадзіне літаральна пад вокнамі кабінэта старшыні аблвыканкаму Ўладзімера Саўчанкі. Валеры Леванеўскі патлумачыў наступнае:

(Леванеўскі: ) «Мы прыйшлі сёньня на сустрэчу. Але не магу дазваніцца да ніводнага чыноўніка. А супрацоўнікі міліцыі чамусьці не пускаюць. Прычым мы прасілі, каб нам залю далі, каб выслухаць пазыцыю кіраўнікоў выканаўчай і заканадаўчай мясцовай улады. Я не лічу, што гэта мітынг ці сход. Людзі папросту прыйшлі на сустрэчу, і іх даволі многа. Але супрацоўнікі міліцыі расцэньваюць гэта як сход і забараняюць тут стаяць...»

Пасьля гэтых словаў Валеры Леванеўскі накіраваўся ў аблвыканкам. Яго доўга чакалі. Ён выйшаў і праз міліцэйскі мэгафон сказаў, што ўвечары ў студыі мясцовага тэлебачаньня адбудзецца гутарка, прысьвечаная праблемам прадпрымальнікаў.

Затым у суправаджэньні міліцыі Леванеўскі накіраваўся ў Ленінскі райаддзел міліцыі быццам бы для гутаркі. Усе 200 прадпрымальнікаў накіраваліся за ім. Яны сталі пад вокнамі абласной управы КГБ, якая знаходзіцца насупраць міліцыі.

Да будынку міліцыі падагналі два Камазы з салдатамі ўнутраных войскаў.

Каб Леванеўскага хутчэй выпусьцілі, публіка скандавала: “Леванеўскі! Леванеўскі!”

Сустрэлі Валерыя Леванеўскага эмацыйнымі выгукамі. Ён паведаміў, што на яго склалі пратакол за правядзеньне несанкцыяванага мітынгу. Калі будзе суд — яму пакуль невядома.
XS
SM
MD
LG