Лінкі ўнівэрсальнага доступу

АДЗІНЫ КАНДЫДАТ НА ПРЭЗЫДЭНТА БУДЗЕ ВЫЗНАЧАНЫ ПЕРАД ПАЧАТКАМ ВЫБАРЧАЙ КАМПАНІІ


Альгерд Невяроўскі, Менск


Асноўным пытаньнем сёньняшняга паседжаньня Каардынацыйнай рады дэмакратычных сілаў стала праблема вызначэньня адзінага кандыдата на прэзыдэнта.

У Радзе, паводле рэглямэнту, сёньня старшынявала грамадзянская ініцыятыва "Хартыя-97", і гэтая акалічнасьць выклікала напачатку паседжаньня рэзкі дэмарш з боку лідэра партыі БСДГ Станіслава Шушкевіча.

Спадар Шушкевіч лічыць, што прадстаўнікі "Хартыі-97" займаюць апошнім часам дэструктыўную пазыцыю па многіх важных палітычных пытаньнях. Лідэр БСДГ на знак пратэсту пакінуў паседжаньне Рады, заявіўшы, што возьме ўдзел у працы КРДС толькі пасьля таго, як скончыцца старшынёўства "Хартыі-97".

На сёньняшнім паседжаньні таксама не было лідэркі партыі жанчын "Надзея" Валянціны Палевіковай (яна ў ад'езьдзе) і прадстаўнікоў Партыі працы, якія гэтак дэманструюць сваю нязгоду з рашэньнем прыпыніць сяброўства ў КРДС "Народнай Грамады" Мікалая Статкевіча.

Такім чынам, сёньня ў працы КРДС бралі ўдзел партыі й арганізацыі, якія падтрымліваюць кандыдатуру Сямёна Домаша.

Прадстаўнікі рэгіянальных грамадзкіх аб'яднаньняў настойвалі, каб Каардынацыйная рада афіцыйна назвала спадара Домаша адзіным кандыдатам на прэзыдэнта. Спасылаліся на тое, што ня варта губляць час і што людзі ў рэгіёнах стаміліся ад нявызначанасьці.

Лідэры ж партыяў даводзілі, што ня варта сьпяшацца, бо афіцыйнае абвяшчэньне Домаша адзіным кандыдатам прывядзе да расколу ў апазыцыйнай кааліцыі.

Сябры КРДС заслухалі інфармацыю аб праведзеных сёньня кансультацыях паміж спадарамі Домашам, Ганчарыкам, Чыгіром і Казлоўскім. (Усе гэтыя прэтэндэнты выказалі жаданьне надалей супрацоўнічаць у справе вызначэньня адзінага кандыдата.)

Пра тое, якое рашэньне прыняла Каардынацыйная рада ў справе адзінага кандыдата, гаворыць старшыня сёньняшняга паседжаньня, каардынатар "Хартыі-97" Андрэй Саньнікаў:

(Саньнікаў: ) "Адбыліся кансультацыі паміж кандыдатамі, і каб не парушыць таго, што робіцца цяпер дзеля кансалідацыі ўсіхных намаганьняў, КРДС палічыла магчымым адкласьці гэтае пытаньне. І прыняць гэтае пытаньне на больш позьнім этапе, таму што мы павінны ведаць вынікі гэтых кансультацыяў.

Мы ня можам заплюшчваць вочы на тое, што й Чыгір і Ганчарык і Казлоўскі робяць нешта дзеля ўмацаваньня апазыцыйных сілаў".

Каардынацыйная рада таксама прыняла адмысловы зварот да кіраўніцтва БСДП "Народная Грамада" з нагоды ўдзелу сябраў гэтай партыі ў давыбарах у так званую палату прадстаўнікоў. Сябры КРДС заклікалі лідэра "Народнай Грамады" Мікалая Статкевіча зьняць сваю кандыдатуру, што "прадэманструе ягонае разуменьне адказнасьці за сытуацыю ў Беларусі й паслужыць умацаваньню адзінства ўсіх дэмакратычных сілаў напярэдадні прэзыдэнцкіх выбараў".

Каардынацыйная рада таксама разгледзела пытаньні супрацоўніцтва апазыцыі зь сябрамі выбарчых камісіяў і выпрацоўкі адзінай стратэгіі на пэрыяд прэзыдэнцкіх выбараў.
XS
SM
MD
LG