ІСЬЛЯМАБАД. Паведамленьні пра лёс выкрадзенага амэрыканскага журналіста вельмі супярэчлівыя. Паліцыя паўдзённага гораду Карачы паведамляе, што невядомая асоба патэлефанавала ў консульства ЗША ў Карачы і запатрабавала 2 мільёны даляраў за вызваленьне карэспандэнта “Уол Стрыт Джорнэл” Даніэля Пэрла, а таксама вызваленьня былога амбасадара Талібану ў Пакістане.
Некалькі заходніх і мясцовых агенцтваў навінаў тым часам атрымалі па электроннай пошце паведамленьні, што ён забіты. Пэрл зьнік мінулым тыднем. Затым малавядомая пакістанская групоўка заявіла, што яна ўтрымлівае журналіста і вызваліць яго, калі пакістанскія баявікі, захопленыя ў Афганістане, будуць выпушчаныя на волю.
Прэзыдэнт ЗША Джордж Буш запэўніў, што Злучаныя Штаты прыкладуць усе намаганьні, каб выратаваць журналіста.