ВАШЫНГТОН. Фэдэральны суд прысяжных Злучаных Штатаў выставіў абвінавачаньні жыхару штату Арызона, у сувязі з фальшывымі сьведчаньнямі, якія ён даў агентам ФБР падчас расьсьледаваньня справы тэрарыстычных нападаў 11 верасьня. Генэральны пракурор Злучаных Штатаў Джон Эшкрафт учора абвясьціў пра абвінавачаньні, выстаўленыя Файсалу Майклу ас-Сальмі. У абвінаваўчым акце гаворыцца, што ас-Сальмі ведаў аднаго з тых, хто 11 верасьня захапіў самалёты, аднак заявіў сьледчым адваротнае. Паводле Эшкрафта, гэты абвінаваўчы акт сьведчыць пра гатовасьць амэрыканскага ўраду з усёй сілай ужыць закон супраць любога, хто будзе перашкаджаць расьсьледаваньню нападаў 11 верасьня.