Дарогу да могілак у вёсцы Калініна пагадзіліся паказаць вясковыя хлапчукі. Едзем па вуліцы імя першай савецкай жанчыны-касманаўткі Валянціны Церашковай. Акурат ад апошняга вясковага плоту і ледзь ня да могілак – шматлікія кучы бытавога сьмецьця, розных сельскагаспадарчых жалязяк.
Вяскоўцы скардзяцца, што хутка, каб пахаваць нябожчыка, трэба будзе перабірацца праз горы сьмецьця.
Ня да спадобы гэта і маім спадарожнікам. Гаворыць шасьціклясьнік Дзяніс Лапіцкі:
(Лапіцкі: ) “Гэта вельмі кепска, што ёсьць такія звалкі. Не падабаецца мне гэта. Трэба, каб былі якія-небудзь скрыні ці месцы, куды зносіць сьмецьце”.
У Калініна пасьля леташняй кампаніі навядзеньня парадку на зямлі цэнтральныя вуліцы сяк-так прыбралі. Але варта ад’ехаць мэтраў 300-400 і раптам трапляеш на сапраўдныя палігоны бытавога сьмецьця.
Вуліца Школьная ў вёсцы Калініна прымыкае да шашы Гомель-Магілеў і сапраўды вядзе да мясцовай школы. Тут таксама натыкаюся на чарговую звалку.
Пытаюся ў даяркі Галіны Раманавай, няўжо нельга прыбраць звалку?
(Раманава: ) “Дык хто ж прыбярэ ? Я ж яе ня вывезу. Старшыня сельскага Савету раіць: “Запісвайце, хто носіць сьмецьце”. Я ж ня буду пільнаваць, хто тое сьмецьце выносіць. Прыбралі б, абгарадзілі б. Пад самым вакном усялякае падла! А тут жа дзеці! Яшчэ пазалетась я прасіла прыбраць гэтую звалку – ніхто ня варушыцца”.
Паводле спадарыні Раманавай, ані Ўзоўскі сельсавет, да якога адносіцца вёска Калініна, ані Буда-Кашалёўскі райвыканкам ня надта рэагуюць на звароты вяскоўцаў.
(Раманава: ) “А мы бачым тое начальства? Адкуль нам ведаць, што яны робяць у тым сельсавеце і ў тым раёне! Мы самі сабе, яны самі сабе. Працуем на фэрме, як тыя бурыя валы дый ўсё”.
У апошнія гады ў Буда-Кашалёве, які і ў шматлікіх іншых раёнах, зь вяскоўцаў сталі зьбіраць розныя мясцовыя падаткі – на добраўпарадкаваньне, рамонт дарог. Падаткамі абкладаюцца самаробная тэхніка, коні на прыватных падворках. У Рагачове ўвялі нават 1% збор з кошту пуцёўкі ў санаторый “Прыдняпроўскі”. Аднак чамусьці гэтых грошай усе адно не хапае, каб ачысьціць населеныя пункты ад звалак ды навесьці парадак на сваёй зямлі.
